धनगढी । बाजुरामा एक महिलाले बाटोमै बच्चा जन्माएकी छन् ।
जिल्लाको स्वामीकार्तिक खापर गाउँपालिका-१ मुक्तिकोटकी ३५ वर्षीया कार्तिका विकले बाटोमा बच्चा जन्माएकी हुन् । वडा नम्बर २ मा रहेको माझगाउँ स्वास्थ्य इकाई केन्द्रमा स्वास्थ्यकर्मी नहुँदा उनलाई आफन्तले गाउँबाट एक घण्टा भन्दा बढीको दुरीमा रहेको स्वास्थ्य केन्द्रमा लगेका थिए । त्यहाँ पनि स्वास्थ्यकर्मी नहुँदा उनलाई फिर्ता ल्याएका थिए ।
घरमा ल्याउँदै गर्दा उनले ताहाडा खोला नजिकै बाटोमा छोरालाई जन्म दिइन् । यसअघि स्वास्थ्य केन्द्रमा रहेका सबै कर्मचारी करार रहेका थिए । गाउँपालिकाले कर्मचारीको म्याद थप नगरेपछि इकाई स्वास्थ्य केन्द्र कर्मचारीविहीन भएको छ ।
स्वास्थ्य चौकीमा कार्यरत अनमी, अहेब कसैको पनि गाउँपालिकाले करार म्याद थप गरेको छैन ।
अन्य स्वास्थ्य संस्थामा पनि करार कर्मचारीको नवीकरण नहुँदा स्वास्थ्य सेवा प्रभावित भएको छ ।
