काठमाडौं । आईसीसी पुरुष विश्वकप लिग टू क्रिकेट अन्तर्गत स्कटल्याण्डमा जारी त्रिकोणात्मक एकदिवसीय श्रृंखलामा नेपालले पहिलो जित निकालेको छ ।
बिहीबार राति भएको खेलमा नेपाललले आयोजक स्कटल्याण्डलाई ५ विकेटले हराएको हो । स्कटल्याण्डविरुद्ध नेपालको यो पहिलो जित हो ।
खेलमा टस हारेर पहिले ब्याटिङ गरेको स्कटल्याण्डले ४२ ओभर ५ बलमा अलआउट हुँदै १ सय ४४ रन मात्रै बनायो ।
स्कटल्याण्डका लागि गाभिन मेनले अविजित ६४ रनको पारी खेले । मार्क वाटले १७, सफ्यान शारिफले १६ तथा कलुम म्याकलोडले १३ रन जोड्दा अन्य खेलाडीले दोहोरो अंक जोड्न सकेनन् ।
नेपालका सोमपाल कामी र आदील आलमले ३/३, कप्तान सन्दीप लामिछानेले २ तथा करण केसी र दिपेन्द्र सिंह ऐरीले १/१ विकेट लिए ।
नवाफमा स्कटल्याण्डले दिएको १ सय ४५ रनको लक्ष्य नेपालले २५ ओभर १ बलमा ५ विकेट गुमाएर पूरा गर्यो ।
नेपालको जितमा आसिफ शेखले ७१ रनको अर्धशतकीय इनिङ खेले । यस्तै, रोहित पौडेलले अविजित ३४ र कुशल भुर्तेलले २७ रन बनाए ।
स्कटल्याण्डका गाभिन मेनले ३ तथा एड्रिन निल र रिची बेरिङटनले १/१ विकेट लिए ।
यो जितसँगै नेपालले १८ खेलमा १७ अंक जोड्दै तालिकाको पाँचौ स्थानको नामिबियालाई उछिनेको छ । स्कटल्याण्ड २२ खेलमा ३० अंक जोडेर दोस्रो स्थानमा रहेको छ । श्रृंखला अन्तर्गत अब नेपालले तेस्रो खेलमा शनिबार नामिबियाविरुद्ध खेल्नेछ भने अन्तिम खेलमा आइतबार स्कटल्याण्डविरुद्ध खेल्नेछ ।
