काठमाडौं । शुक्रबारदेखि देशभर टाइफाइडविरुद्धको खोप अभियान सुरु भएको छ । सरकारले स्वास्थ्य संस्था, विद्यालय तथा नजिकको वडा कार्यालयमा १५ महिनादेखि १५ वर्षमुनिका बालबालिकालाई टाइफाइडविरुद्धको खोप लगाउन लागेको हो ।
म्यादी ज्वरो अर्थात् टाइफाइड एक संक्रामक रोग हो । टाइफाइडका कारण ज्वरो आउने शरीरको विभिन्न भाग दुख्ने, पसिना आउने, वान्ता हुने, कब्जियत हुने, शरीर कमजोर हुँदै जाने जस्ता समस्या निम्तिन्छ ।
टाइफाइडले विशेषगरी गर्मी महिनामा बढी सताउने गर्छ । दूषित पानी र प्रदूषित खाद्य पदार्थको प्रयोगले यो रोग लाग्ने गर्छ । टाइफाइड जुनसुकै उमेर समूहका मान्छेलाई पनि हुन सक्ने भएपनि १५ वर्ष मुनिका बालबालिकामा यसको संक्रमण दर बढी देखिएको छ । त्यसैले खोप पनि विशेषगरी यही समूहका मान्छेलाई धेरै लगाउन लागिएको स्वास्थ्य मन्त्रालयले जनाएको छ ।
यो खोप सुरुमा १५ महिनादेखि १५ वर्ष उमेर समूहलाई देशभर एकैसाथ लगाउन लागिएको हो ।
- टाइफाइडका लक्षणहरु
–पेट तथा टाउको दुख्नु
–बढी जाडो हुनु, पसिना आउनु
–ज्वरो आउनु, वान्ता हुनु
–पसिना आउनु, चिसो महसुस हुनु
–पखालाका साथै सुख्खा खोकी लाग्नु
- टाइफाइड हुने कारणहरु
–फोहोर पानी पिउनु तथा नुहाउनु
–दूषित पानी खानु तथा त्यस्तो पानीले खाना पकाउनु
–दूषित पानीले खानेकुरा धुनु
–टाइफाइड भएका व्यक्तिसँग संगत गर्नु
- टाइफाइडबाट हुने जटिलता
–सानो आन्द्रामा घाउ हुनु, प्वाल पर्नु
–रगत बग्नु
–टाइफाइडको संक्रमण फैलिन गई शरीरका अन्य अंगमा संक्रमण हुनु
- टाइफाइडबाट बच्ने उपाय
–सफा पानी पिउनु अर्थात् उमालेर मात्रै प्रयोग गर्ने
–खानाखानु अघि राम्ररी हात धुने
–सफा चर्पीको प्रयोग गर्ने र बच्चाको दिसा चर्पीमा फाल्ने
–राम्ररी पकाएको र छोपेर राखेको खानेकुरा मात्रै खाने
–बासी, सडेगलेका र झिंगा भन्केका खानेकुरा नखाने
–बेलाबेला साबुन पानीले राम्ररी हातधुने
–पौष्टिक र सन्तुलित आहार मात्रै लिने
