काठमाडौं, । प्रधानमन्त्री शेरबहादुर देउवासहित विभिन्न मन्त्रीहरु आइसोलेशनमा बसेसँगै मन्त्रिपरिषद् बैठक समेत प्रभावित भएको छ ।
माओवादी केन्द्रका अध्यक्ष पुष्पकमल दाहालमा कोरोना संक्रमण पुष्टि भएसँगै प्रधानमन्त्री शेरबहादुर देउवासहित उहाँको क्याबिनेटका कतिपय मन्त्रीहरु कन्ट्याक्ट ट्रेसिङमा परेका छन् ।कन्ट्याक्ट ट्रेसिङमा परेपछि प्रधानमन्त्री देउवा शनिबार देखिनै क्वारेन्टिनमा आइसोलेशनमा हुनुहुन्छ भने सञ्चारमन्त्री ज्ञानेन्द्रबहादुर कार्की र शिक्षा मन्त्री देवेन्द्र पाडेले पनि क्वारेन्टिनमा बस्नुभएको छ ।
प्रधानमन्त्री लगायतको कोरोना रिपोर्ट नेगेटिभ आएपछि मात्रै बैठक बस्नेछ । मन्त्रिपरिषद्को बैठक बिहीबार र सोमबार नियमितरुपमा बस्ने प्रचलन छ । कोरोनाको महामारीका सन्दर्भमा क्याबिनेटबाटै पनि कतिपय निर्णयहरु गर्नुपर्ने भएपनि भीआईपीहरु नै प्रभावित बनेका हुन् ।
माओवादी केन्द्रका अध्यक्ष दाहालसहति नेता नारायणकाजी श्रेष्ठ, मातृका यादवलगायतका दाहालको सचिवालय र केन्द्रीय कार्यालयका अधिकांश कर्मचारीलाई संक्रमण पुष्टि भएको थियो ।
कोरोना संक्रमण पुष्टि हुनुअघि शुक्रबार बिहान दाहाल उच्चस्तरीय राजनीतिक समन्वय समितिको बैठकमा सहभागी हुनुभएको थियो । दाहाललाई कोरोना पोजेटिभ देखिएसँगै उहाँको कन्ट्याक्ट ट्रेसिङमा प्रधानमन्त्री देउवा र मन्त्रीहरु र विभिन्न दलका शीर्ष नेताहरू समेत परेका हुन् ।
