काठमाडौँ । नेकपा (माओवादी केन्द्र)का अध्यक्ष पुष्पकमल दाहाल प्रचण्डले चितवनमा जारी एमाले महाधिवेशनलाई ‘कुम्भ मेला’को संज्ञा दिएका छन् ।
शनिबार आफ्नो पार्टीको पालिका अधिवेशनको भर्चुअल माध्यमबाट उद्घाटन गर्दै प्रचन्डले उक्त कुरा बताएका हुन् । शुक्रबारदेखि चितवनमा जारी एमालेको १० औँ महाधिवेशन विचार तथा बहस बिनको खालि कुम्भमेला बनेको प्रचन्डको भनाइ थियो । उनले पार्टीमा विचार निर्माणका लागि बहस गर्नुपर्ने तर एमालेको महाधिवेशनमा त्यसो नभएको बताए ।
‘हिजो हामीले चितवनमा कुम्भमेलाजस्तो देख्यौँ । जहाँ विचार र बहसलाई कुनै ठाउँ छैन, त्यहाँ जनतालाई भ्रम दिने ध्यान मात्रै छ,’ उनले भने, ‘उनीहरुभन्दा भिन्न हामी चैँ विचार निर्माण, राजनीतिक लाइन र संगठनात्मक कार्यदिशाका साथै कार्यशैली र आचार व्यवहारलाई प्राथमकिता दिन सम्मेलन गर्दैछौँ ।’
वडास्तरदेखि नै सम्मेलन गरेर अन्तमा राष्ट्रिय सम्मेलनको तयारी गरिरहेको आफ्नो पार्टीले विचारको बहसलाई प्राथमिकता दिँदै आएको प्रचण्डको भनाइ थियो । उनले अरुका तथाकथित अधिवशेनसँग आफ्नो पार्टीको वैचारिक संश्लेषण हुने सम्मेलनको तुलना गर्न नसकिने पनि बताए ।
