प्रचण्डले सर्वोच्च अदालतमा देखिएको समस्याका विषयमा अहिलेसम्म गठबन्धनभित्र छलफल नभएको दाबी समेत गरे । तर हालै सुदूरपश्चिम पुगेर फर्किएका सत्तारुढ दल एकीकृत समाजवादीका अध्यक्ष माधवकुमार नेपालले भने गठबन्धनको बैठक बसेर अदालतको समस्या समाधानका लागि आवश्यक पहल गर्ने निर्णय भएको बताएका थिए ।
एमसीसीको सन्दर्भमा बोल्दै प्रचण्डले जनतालाई बुझाएर मात्र पारित गर्नुपर्छ भन्ने आफ्नो धारणा रहेको जनाए । सत्ता गठबन्धनबारे केही मानिसले आफ्नो स्वार्थ अनुकूल बोलिरहेकाले त्यसमा कुनै सत्यता नरहेको दाबी उनले गरे ।
अहिलेको गठबन्धनले चुनावसम्म निरन्तरता पाउने दाबी प्रचण्डले गरे । हाल नेकपा माओवादी केन्द्रले नेतृत्व गरिरहेको सुदूरपश्चिम प्रदेश सरकार पनि परिवर्तन नहुने उनले बताए ।
बुधबार बिहान धनगढी आइपुगेका प्रचण्ड भजनी नगरपालिकाको नवनिर्मित कार्यालय भवन उद्घाटन गर्न पूर्वी कैलाली प्रस्थान गरेका छन् । उनी यहाँ रहँदा विभिन्न ठाउँमा पार्टीले आयोजना गर्ने कार्यक्रममा सहभागी हुने माओवादी केन्द्रले जनाएको छ ।
