समितिमा सत्तारुढ पाँच दलका शीर्ष नेताहरु सदस्य छन् । कांग्रेसबाट वरिष्ठ नेता पौडेल र पूर्वमहामन्त्री कृष्णप्रसाद सिटौला, नेकपा माओवादी केन्द्रबाट अध्यक्ष पुष्पकमल दाहाल प्रचण्ड र नेता नारायणकाजी श्रेष्ठ, नेकपा एकीकृत समाजवादीबाट अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र राष्ट्रिय जनमोर्चाबाट अध्यक्ष चित्रबहादुर केसी र उपाध्यक्ष दुर्गा पौडेल सदस्य छन् । आलोपालोमार्फत् दुई–दुई महिनामा समिति संयोजक परिवर्तन गर्न दलहरुबीच सहमति छ ।
संविधानबाहिर गएर राजनीतिक समिति गठन गरिएको भन्दै सत्तारुढ दलभित्रै असन्तुष्टि छ । प्रमुख प्रतिपक्षी नेकपा एमालेले पनि समिति गठनको विरोध गर्दै आएको छ । तर संयोजक पौडेलले सरकारलाई सहयोग गर्न समिति गठन गरिएको भन्दै बचाउ गर्दै आएका छन् । समितिले सरकारको कामकारवाहीमाथि नियन्त्रण र हस्तक्षेप नगर्ने उनको भनाइ छ ।
