काठमाडौं, । नेकपा एमालेले विधान महाधिवेशनमा पेस गरिने विभिन्न प्रतिवेदन पारित गरेको छ । आइतबार तुलसीलाल अमात्य स्मृति प्रतिष्ठानमा बसेको केन्द्रीय कमिटी बैठकले अध्यक्ष केपी शर्मा ओलीको राजनीतिक प्रतिवेदन, महासचिव ईश्वर पोखरेलको सांगठानिक प्रतिवेदन र उपमहासचिव बिष्णु पौडेलको विधान मस्यौदा प्रतिवेदन सुझावसहित पारित गरेको हो ।
एमालेले अब विधानमै सात उपाध्यक्ष राख्ने सुझाव अनुमोदन गर्ने भएको छ । विधान महाधिवेशनअघि प्रस्तावित एमालेको विधानमा ३ उपाध्यक्ष राख्ने मस्यौदा गरिएको थियो । उक्त मस्यौदामाथि अधिकाँश सदस्यहरुले सात उपाध्यक्षको व्यवस्था गर्नुपर्ने सुझाव दिएका थिए ।
जवाफ दिने क्रममा अध्यक्ष ओलीले उक्त सुझाव राम्रो भएको भन्दै त्यसलाई केन्द्रीय कमिटीबाट निर्णय गरेर अघि बढाइने बताउनुभयो । एमालेको तीन बुँदामा एमाले उपमहासचिव घनश्याम भुषालले भने फरक मत राख्नुभएको छ । भुसालले राजनीतिक प्रतिवेदनमा जनताको बहुदलीय जनवादबारे प्रष्ट नभएको भन्दै फरक मत राख्नुभएको हो ।
यसअघि छलफलका क्रममा उठेका प्रश्नको जवाफ दिँदै अध्यक्ष ओलीले संसद विघटनको बचाउ गर्नुभएको थियो । ओलीले गत पुस र वैशाखमा प्रतिनिधि सभा विघटन गर्नुभएको थियो । दुबै पटक सर्वोच्च अदालतको संवैधानिक इजलासले संसद विघटन असंवैधानिक भएको आदेश दिएको थियो ।
सर्वोच्चले नेपालको संविधानमा संसदबाट नयाँ सरकार बन्न सक्ने अवस्था रहुन्जेल संसद विघटन नहुने व्यवस्था रहेको व्याख्या गरेको छ । तर ओलीले भने दुबै पटकको संसद विघटन उचित भएको तर्क गर्दै आउनुभएको छ । बैठकमा सदस्यहरुले पार्टी एकताका विषयमा उठाएका प्रश्नको जवाफ दिँदै अध्यक्ष ओलीले माओवादीसँगको एकता सोचिविचारी नै गरेको जवाफ दिनुभयो ।
तर त्यो एकता भंग गर्न जुन ढंगको षड्यन्त्र भयो, त्यसलाई चिर्न नसक्दा विघटन रोक्न नसकिएको उहाँको तर्क छ ।
