एजेन्सी । भारतमा कोरोना भाइरस तीव्र गतिमा बढिरहेको छ। त्यहाँ संक्रमणले प्रत्येक दिन नयाँ रेकर्ड राखिरहेको छ ।भारतको केन्द्रीय स्वास्थ्य मन्त्रालयका अनुसार त्यहाँका १० राज्यको अवस्था एकदम खराब छ। मन्त्रालयले सार्वजनिक गरेको आधिकारिक तथ्यांक अनुसार, कोरोना संक्रमणको दैनिक नयाँ घटनाहरू ७४.१५ प्रतिशत त्यहाँका १० राज्य महाराष्ट्र, उत्तर प्रदेश, दिल्ली, कर्नाटक, केरला, छत्तीसगढ़, मध्य प्रदेश, तमिलनाडु, गुजरात र राजस्थानमा रहेका छन् ।
यति मात्र होइन, ६६.६६ प्रतिशत नयाँ बिरामीहरू महाराष्ट्र, छत्तीसगढ़, उत्तर प्रदेश, कर्नाटक, राजस्थान, गुजरात र केरलाबाट आएका छन्। चिन्ताजनक कुरा संक्रमणको दरमा उच्च वुद्धि र रिकभरी दर घटिरहेका छन्।
भारतमा कोरोनाभाइरसबाट एकैदिन सङ्क्रमित भएकाहरुको सङ्ख्या साढे तीन लाख पुग्न लागेको छ । सरकारी अधिकारीहरुले दिएको जानकारीअनुसार पछिल्लो २४ घण्टामा भारतमा तीन लाख ४७ हजार ७८६ जना सङ्क्रमित भएका हुन् ।
यो सङ्ख्या कोरोनाभाइरसको महामारी सुरु भएदेखिकै सवैभन्दा धेरै भएको पनि अधिकारीहरुले जनाएका छन् । केन्द्रीय स्वास्थ्य मन्त्रालयका अधिकारीहरुले पछिल्लो एक दिनमा दुई हजार ६२४ जनाको मृत्यु भएको विवरण सार्वजनिक गरेका छन् ।
योसँगै भारतमा कोरोनाभाइरसबाट अहिलेसम्म कुल एक लाख ८९ हजार ५४४ जनाको मृत्यु भएको मन्त्रालयले जनाएको छ । भारतमा अहिलेसम्म कुल एक करोड ६६ लाख १० हजार ४८१ जना कोरोनाभाइरसबाट सङ्क्रमित भएको पाइएको छ ।
कुल सङ्क्रमित मध्ये २५ लाख ५२ हजार ९४० जना अझै पनि सङ्क्रमित अवस्थामै रहेको मन्त्रालयको तथ्याङ्क छ ।
