काठमाडौं । तत्कालीन नेकपा दाहाल–नेपाल समूहको स्थायी समिति बैठकले अब एमाले र माओवादी केन्द्रको रूपमा अलग–अलग पार्टीमा जाने निर्णय गरेको छ ।
सर्वोच्च अदालतको फैसलाको भोलिपल्ट सोमबार माओवादी मूख्यालय पेरिसडाँडामा बसेको स्थायी समितिको अन्तिम बैठकले अब आ–आफ्नो बाटोमा लाग्ने निर्णय गरेको हो ।
बैठकपछि ईमेज टेलिभिजनसँग कुरा गर्दै समूहका नेता गोकर्ण विष्टले आ–आफ्ना पार्टीमा जाने निर्णय भएको भन्दै आफू पूर्ववत् रूपमा एमालेको निर्वाचित सचिवको रूपमा क्रियाशील हुने बताउनुभयो ।
दाहाल–नेपाल समूहका नेताहरूले आजको बैठकलाई विदाई बैठक समेत भनेका छन् । बैठकमा बोल्ने सदस्यहरुले आ–आफना पार्टीमा गएर पुनः एकताका लागि पहल गर्नुपर्ने सुझाव समेत दिएका थिए ।
माधवकुमार नेपाल पक्षको बैठकले नेकपा एमालेमा फर्कने निर्णय गरेको थियो । सोमबार दिउँसो नयाँ बानेश्वरस्थित एक होटलमा बसेको नेपाल समूहको बैठकले एमाले पार्टीमै फर्कने र अध्यक्ष केपी ओली प्रवृत्ति विरुद्ध संघर्ष गर्ने निष्कर्ष निकालेको हो ।
छलफलमा १३ जना स्थायी समिति सदस्य सहभागी थिए । सर्वोच्च अदालतले ओली–दाहाल नेतृत्वको नेकपालाई अवैध ठहर गर्दै उक्त नाम ऋषि कट्टेल नेतृत्वको पार्टीलाई दिने फैसला गर्दै एमाले र माओवादी केन्द्र पूर्ववत् कायम हुने आदेश दिएको थियो ।
