वीरगञ्ज,/ वीरगञ्जस्थित महावाणीज्यदुतावासले भारतको ७२ औं गणतन्त्र दिवस मनाएको छ ।
वीरगञ्जको श्रीपुरमा अवस्थित दुतावास कार्यालय परिसरमा आयोजित कार्यक्रममा भारतीय महावाणिज्य दुत नितेश कुमारले भारतको झण्डोत्तोलन गर्दै भारतीय राष्ट्रपति रामनाथ कोविन्दद्वारा जारी गरिएको सन्देश वाचन गर्नु भएको थियो ।
कार्यक्रममा प्रदेश नम्बर २ का मुख्यमन्त्री लालबाबु राउतले शुभकामना व्यक्त गर्दै भारत नेपालको असल मित्र भएको बताउनुभयो ।
मुख्यमन्त्री राउतले कोरोना महामारीको संकटको समयमा भारतले कोरोनाको भ्याक्सिन प्रदान गरी अतुलनीय सहयोग गरेकोमा भारत सरकारलाई धन्यवादसमेत व्यक्त गर्नुभयो ।
कार्यक्रममा विभिन्न जिल्लाका सुरक्षा अधिकारी, उद्योगपति, सञ्चारकर्मीलगायत नेपालमा रहेका भारतीय नागरिकहरुको उपस्थिती रहेको थियो ।
