काठमाडौं । सामसङ नेपालले Galaxy S26 सिरिजअन्तर्गत नयाँ स्मार्टफोन Galaxy S26 FE सार्वजनिक गरेको छ। नयाँ फोनमा सुधारिएको क्यामेरा, Galaxy AI र One UI 9 सहितका सुविधा उपलब्ध छन्। कम्पनीले दैनिक प्रयोगलाई सहज बनाउने र प्रिमियम स्मार्टफोनको अनुभव थप ग्राहकसम्म पुर्याउने उद्देश्यले यो फोन बजारमा ल्याएको जनाएको छ।
Galaxy S26 FE को ८ जीबी र्याम र २५६ जीबी स्टोरेज भेरियन्टको मूल्य १ लाख २४ हजार ९९९ रुपैयाँ तोकिएको छ। यो फोन Pistachio, Graphite र Blueberry गरी तीन रङमा उपलब्ध हुनेछ।
सामसङ नेपालका सिनियर डाइरेक्टर तथा मोबाइल एक्सपेरियन्स (MX) प्रमुख प्रणय रत्न स्थापितले Galaxy S26 FE दैनिक जीवनमा उपयोगी हुने सुविधालाई प्राथमिकतामा राखेर तयार गरिएको बताए। उनका अनुसार फोनले Galaxy S सिरिजका विशेष सुविधालाई थप ग्राहकसम्म पुर्याउन सहयोग गर्नेछ।
क्यामेरा र भिडियोमा नयाँ सुविधा
Galaxy S26 FE मा सुधारिएको ट्रिपल रियर क्यामेरा र उन्नत इमेज प्रोसेसिङ प्रविधि समावेश गरिएको छ। यसले विभिन्न परिस्थितिमा स्पष्ट तस्बिर खिच्न र फोटो सम्पादन गर्न सहज बनाउने कम्पनीको भनाइ छ।
फोनमा My FanCam सुविधाले भिडियो खिच्दा छनोट गरिएको व्यक्तिलाई ट्र्याक गर्दै फ्रेमको बीचमा राख्न मद्दत गर्छ। त्यस्तै, Horizontal Lock सहितको Super Steady सुविधाले चलायमान दृश्यको भिडियो खिच्दा स्थिरता कायम राख्न सहयोग पुर्याउँछ।
यसमा 3x Optical Zoom सुविधा पनि छ, जसबाट टाढाका दृश्यलाई नजिकबाट खिच्न सकिन्छ। Nightography सुविधाले कम प्रकाश भएको अवस्थामा समेत स्पष्ट र विस्तृत तस्बिर खिच्न सहयोग गर्ने कम्पनीले जनाएको छ।
Galaxy AI सहितका स्मार्ट सुविधा
One UI 9 मा आधारित Galaxy S26 FE मा Galaxy AI का विभिन्न सुविधा समावेश छन्। प्रयोगकर्ताको आवश्यकता र सन्दर्भअनुसार जानकारी उपलब्ध गराउने तथा दैनिक काम व्यवस्थित गर्न सहयोग गर्ने उद्देश्यले यी सुविधा राखिएको कम्पनीको भनाइ छ।
खरिदमा एक्सचेन्ज बोनस र निःशुल्क सदस्यता
Galaxy S26 FE खरिद गर्ने ग्राहकले १० हजार रुपैयाँसम्म अतिरिक्त एक्सचेन्ज बोनस पाउनेछन्। यसबाट पुरानो फोन साटेर नयाँ फोन खरिद गर्दा लाग्ने खर्च कम गर्न सकिने कम्पनीले जनाएको छ।
त्यस्तै, ग्राहकले १८ हजार ३५१ रुपैयाँ मूल्यको Google AI Pro सदस्यता ६ महिनाका लागि निःशुल्क प्राप्त गर्नेछन्।
फोन खरिदका लागि २४ महिनाको ईएमआई सुविधा पनि उपलब्ध छ। यसअन्तर्गत मासिक किस्ता ३ हजार ३९२ रुपैयाँबाट सुरु हुने कम्पनीले जनाएको छ।
