चितवन । बिलबिजकबिना मोबाइल फोन बिक्री तथा ओसारपसार भइरहेको सूचनाका आधारमा प्रहरीले चितवनका विभिन्न स्थानबाट ६३ थान मोबाइल तथा विद्युतीय उपकरणसहित दुई जनालाई पक्राउ गरेको छ ।
जिल्ला प्रहरी कार्यालय चितवनका अनुसार भरतपुर महानगरपालिका–१० स्थित हाकिमचोकबाट बिलबिजकबिना मोबाइल बिक्री भइरहेको सूचनाका आधारमा प्रहरीले एक मोबाइल पसल सञ्चालकलाई नियन्त्रणमा लिएको हो ।
प्रहरीले ४१ वर्षीय दीपक प्रसाईंलाई नियन्त्रणमा लिएर उनले सञ्चालन गर्दै आएको ‘दीपक मोबाइल’मा खानतलासी गरेको थियो । सो क्रममा विभिन्न सिरिजका एप्पलका आइफोन ५० थान, सामसुङका चार थान, रेडमीका दुई थान, एप्पल आइप्याड एक थान र भिभोको एक थान गरी जम्मा ५८ थान मोबाइल तथा विद्युतीय उपकरण बरामद गरिएको प्रहरीले जनाएको छ ।
जिल्ला प्रहरी कार्यालय चितवनका सूचना अधिकारी प्रहरी नायब उपरीक्षक चन्द्रभूषण यादवका अनुसार बरामद गरिएका मोबाइल तथा उपकरणको खरिद–बिक्रीसँग सम्बन्धित आवश्यक बिलबिजक तथा कागजात नभेटिएपछि प्रसाईंलाई नियन्त्रणमा लिइएको हो ।
त्यसैगरी, प्रहरीले भरतपुर महानगरपालिका–१ रामनगर क्षेत्रबाट थप पाँच थान मोबाइलसहित एक जनालाई पक्राउ गरेको छ । उक्त क्षेत्रमा बिलबिजकबिना मोबाइल फोन ओसारपसार भइरहेको भन्ने सूचनाका आधारमा प्रहरीले निगरानी बढाएको थियो ।
सो क्रममा २८ वर्षीय उमनन्द भुसाललाई नियन्त्रणमा लिइएको प्रहरीले जनाएको छ । उनको साथबाट बिलबिजकबिना बोकेका सामसुङ कम्पनीका पाँच थान मोबाइल फोन बरामद गरिएको सूचना अधिकारी यादवले जानकारी दिए ।
यसरी दुवै स्थानबाट बरामद गरिएका मोबाइल तथा अन्य उपकरणको वैधता र स्रोतका विषयमा आवश्यक अनुसन्धानका लागि प्रहरीले पक्राउ परेका दुवै जनालाई बरामद सामानसहित सम्बन्धित निकायमा बुझाएको छ ।
प्रहरीका अनुसार असोज १८ गते पक्राउ परेका दुवै जनालाई बरामद मोबाइलसहित आवश्यक कानुनी कारबाहीका लागि भन्सार कार्यालय वीरगञ्ज, पर्सा पठाइएको छ ।
बिलबिजकबिना मोबाइल तथा अन्य विद्युतीय उपकरणको कारोबारले राजस्व छली तथा अवैध आयातलाई प्रोत्साहन गर्न सक्ने भएकाले प्रहरीले यस्ता गतिविधिमाथि निगरानी बढाउँदै आएको जनाएको छ । बरामद भएका मोबाइलको स्रोत, आयात प्रक्रिया तथा आवश्यक राजस्वसम्बन्धी विषयमा सम्बन्धित भन्सार कार्यालयबाट थप प्रक्रिया अघि बढाइने बताइएको छ ।
