काठमाडौँ । परराष्ट्रमन्त्री शिशिर खनाल संयुक्त राष्ट्रसंघको ८१औँ महासभामा सहभागी भएर आज असोज १४ गते बिहान स्वदेश फर्कँदै हुनुहुन्छ।
संयुक्त राष्ट्रसंघको महासभामा नेपालको सहभागिता जनाएर स्वदेश फर्किएलगत्तै मन्त्री खनालले महासभाका क्रममा भएका विभिन्न उच्चस्तरीय कार्यक्रम तथा द्विपक्षीय भेटवार्ताबारे जानकारी गराउनुहुने भएको छ।
परराष्ट्र मन्त्रालयका अनुसार मन्त्री खनालले त्रिभुवन अन्तर्राष्ट्रिय विमानस्थलस्थित विशिष्ट कक्ष (भीआईपी लाउन्ज) को मिडिया कक्षमा बिहान ८ः२० बजे प्रेस ब्रिफिङ गर्नुहुनेछ।
प्रेस ब्रिफिङका क्रममा संयुक्त राष्ट्रसंघको महासभामा नेपालको सहभागिता, नेपालले उठाएका विषय तथा विभिन्न मुलुकका प्रतिनिधिसँग भएका भेटवार्ताका विषयमा जानकारी दिइने मन्त्रालयले जनाएको छ।
मन्त्री खनालको नेतृत्वमा नेपाली प्रतिनिधिमण्डलले महासभाका क्रममा विभिन्न उच्चस्तरीय कार्यक्रम तथा द्विपक्षीय भेटवार्तामा सहभागिता जनाएको थियो। महासभामा नेपालको धारणा प्रस्तुत गर्नुका साथै विभिन्न अन्तर्राष्ट्रिय तथा क्षेत्रीय विषयमा छलफल भएको जनाइएको छ।
परराष्ट्र मन्त्रालयले प्रेस ब्रिफिङमा सहभागी हुन सञ्चारकर्मीलाई आग्रह गरेको छ। ब्रिफिङपछि महासभामा नेपालको सहभागिता र त्यस क्रममा भएका कूटनीतिक गतिविधिबारे थप विवरण सार्वजनिक हुने अपेक्षा गरिएको छ।
