काठमाडौं । अविरल वर्षाका कारण ९ असोजदेखि बन्द रहेको बीपी राजमार्ग सञ्चालनमा आएको छ। सडकमा आएको बाढी, पहिरो तथा डाइभर्सन बगाएपछि अवरुद्ध बनेको राजमार्ग मर्मत तथा अस्थायी डाइभर्सन निर्माण गरेर पुनः सञ्चालनमा ल्याइएको हो।
राजमार्ग सञ्चालनमा आए पनि तत्कालका लागि साना सवारीसाधनलाई मात्र आवतजावत गर्न दिइएको छ। सडकको अवस्था पूर्ण रूपमा सुरक्षित बनाउने काम जारी रहेकाले ठूला तथा मालवाहक सवारीसाधनलाई भने तत्काल सञ्चालन अनुमति दिइएको छैन।
अविरल वर्षापछि आएको बाढी तथा पहिरोका कारण बीपी राजमार्गका विभिन्न खण्डमा यातायात अवरुद्ध भएको थियो। विशेषगरी नमोबुद्ध नगरपालिका–६ चौकीडाँडा, रोशी गाउँपालिका–७ घुमाउने तथा रोशी गाउँपालिका–११ र १२ को माम्ती क्षेत्रमा रोशी खोलामा आएको बाढीले सडकका अस्थायी डाइभर्सन बगाएपछि यातायात सञ्चालनमा समस्या भएको थियो।
त्यस्तै, नमोबुद्ध नगरपालिका–६ को चौकीडाँडा, रोशी गाउँपालिका–७ को चारसयवेशी, रोशी–८ को गिम्दीवेशी तथा रोशी–११ को माम्ती क्षेत्रमा पहिरो खसेर सडक अवरुद्ध भएको थियो। लगातारको वर्षाका कारण सडकमा थप क्षति पुग्ने जोखिमसमेत देखिएपछि यातायात सञ्चालनमा रोक लगाइएको थियो।
सडक डिभिजन कार्यालय भक्तपुरका अनुसार चौकीडाँडा क्षेत्रमा खोलाबाट तथा खोलाभन्दा माथिल्लो भागमा गरी दुई स्थानमा अस्थायी डाइभर्सन निर्माण गरिएको छ। डाइभर्सन निर्माण तथा सडक सफाइको कामपछि साना सवारीसाधनका लागि राजमार्ग खुलाइएको हो।
कार्यालयले सडकको अवस्था हेरेर दिउँसोदेखि सबै प्रकारका सवारीसाधन सञ्चालनमा ल्याउने तयारी गरेको जनाएको छ। यद्यपि, ६ चक्के मालवाहक सवारीसाधन, बस तथा मिनीबस सञ्चालन गर्न भने अझै केही घण्टा पर्खनुपर्ने अवस्था रहेको कार्यालयले जनाएको छ।
बाढी र पहिरोका कारण क्षतिग्रस्त सडकखण्डमा तत्कालका लागि अस्थायी व्यवस्थामार्फत यातायात सञ्चालन गरिएको हुँदा चालक तथा यात्रुलाई सावधानी अपनाउनुपर्ने अवस्था रहेको छ। विशेषगरी डाइभर्सन तथा पहिरो प्रभावित क्षेत्रमा सडकको अवस्था हेरेर मात्रै सवारी सञ्चालन गर्नुपर्ने देखिएको छ।
बीपी राजमार्ग काठमाडौंलाई पूर्वी नेपालका विभिन्न जिल्लासँग जोड्ने महत्वपूर्ण सडकमार्ग भएकाले यसको अवरोधले यात्रु तथा मालसामान ढुवानीमा प्रत्यक्ष प्रभाव पार्ने गरेको छ। राजमार्ग सञ्चालनमा आएपछि लामो समयदेखि रोकिएका यात्रु तथा सवारीसाधनलाई आवतजावतमा सहज हुने अपेक्षा गरिएको छ।
सडक डिभिजन कार्यालयले सडकको अवस्थाअनुसार क्रमशः सबै प्रकारका सवारीसाधन सञ्चालन गर्ने तयारी गरिरहेको जनाएको छ। पूर्ण रूपमा यातायात सञ्चालनमा आएपछि राजमार्ग हुँदै यात्रा गर्ने यात्रु तथा चालकलाई मौसम र सडकको अवस्थाबारे जानकारी लिएर यात्रा गर्न सुझाव दिइएको छ।
