काठमाडौँ । केही दिनदेखि भइरहेको निरन्तर वर्षाका कारण देशभर बाढी, पहिरो, सडक भासिने तथा नदी–खोला आसपासका क्षेत्रमा डुबानको जोखिम बढेको छ। वर्षाका कारण पृथ्वी, बीपी, सिद्धिचरण, मध्यपहाडी, कालीगण्डकी, तमोर, राप्ती र कर्णालीलगायत प्रमुख राजमार्गका विभिन्न खण्ड प्रभावित भएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार नदी तथा खोलामा जलसतह बढेसँगै तटीय र होचा भूभागमा जोखिम थपिएको छ।

पृथ्वी राजमार्गअन्तर्गत कृष्णभीर, चौकीभीर, जवाङ खोला र फिस्लिङ क्षेत्रमा पहिरोका कारण यातायात प्रभावित भएको छ। ती स्थानमा पहिरो पन्छाएर सडक सञ्चालनमा ल्याउने प्रयास भइरहेको छ।

तर वर्षा नरोकिएकाले पहिरो पुनः खस्ने र सडक अवरुद्ध हुने जोखिम कायमै रहेको प्राधिकरणले जनाएको छ। विभिन्न स्थानमा पहिरो पन्छाउने काम जारी रहे पनि लगातारको वर्षाका कारण सडक पूर्ण रूपमा सञ्चालनमा ल्याउन चुनौती देखिएको छ।

सडक खुलाउन आवश्यक प्राविधिक टोली र मेसिन तयारी अवस्थामा राखिएको प्राधिकरणले जनाएको छ।