काठमाडौं । नेकपा एमालेले चाडपर्व नजिकिँदै गर्दा दैनिक उपभोग्य वस्तुको मूल्यवृद्धि नियन्त्रण गर्न सरकार असफल भएको आरोप लगाएको छ। जनतालाई राहत दिनुपर्ने समयमा बजारमा दैनिक उपभोग्य वस्तुको मूल्य बढ्दै गएको भन्दै एमालेले सरकारको आपूर्ति व्यवस्थापन तथा बजार अनुगमन प्रभावकारी हुन नसकेको दाबी गरेको हो।
एमाले प्रचार तथा प्रकाशन विभाग प्रमुख नीरज आचार्यले बुधबार प्रेस नोट जारी गर्दै चाडपर्वको समयमा जनतालाई राहत दिनुको सट्टा सरकार आफ्नो असफलता र कमजोरी ढाकछोप गर्न विषयान्तरको राजनीति गरिरहेको आरोप लगाउनुभएको छ।
आचार्यले दैनिक उपभोग्य वस्तुको आपूर्ति तथा व्यवस्थापनसँगै कालोबजारी नियन्त्रणमा समेत सरकार असफल भएको दाबी गर्नुभएको छ। नेपालीहरूका प्रमुख सांस्कृतिक चाडपर्वहरू नजिकिँदै गर्दा बजारमा उपभोग्य वस्तुको मूल्यवृद्धि हुँदा त्यसको प्रत्यक्ष असर सर्वसाधारणको दैनिक जीवनमा परेको उहाँको भनाइ छ।
ग्यास आपूर्तिमा समस्या भएको एमालेको दाबी
एमालेले खाना पकाउने ग्यासको सहज आपूर्ति र व्यवस्थापन गर्न सरकार असफल भएको आरोप पनि लगाएको छ। ग्यासको अभाव तथा आपूर्ति व्यवस्थापनमा देखिएको समस्याले सर्वसाधारणले सास्ती भोग्नुपरेको आचार्यले बताउनुभएको छ।
उहाँले सरकारले बजार व्यवस्थापन र जनताका तत्कालीन समस्यामा ध्यान दिनुपर्नेमा एमालेविरुद्ध दुष्प्रचार गर्ने काम भइरहेको आरोप लगाउनुभएको छ।
ललितपुरका एक पौडेल थरका व्यापारीलाई एमाले केन्द्रीय सदस्यको ‘कृत्रिम परिचय’ दिँदै ग्यास लुकाएको आरोप लगाएर पार्टीलाई बदनाम गर्ने प्रयास भएको दाबीसमेत आचार्यले गर्नुभएको छ। एमालेले उक्त विषयलाई पार्टीविरुद्ध भइरहेको दुष्प्रचारको उदाहरणका रूपमा प्रस्तुत गरेको छ।
सामाजिक सञ्जाल दुरुपयोगको आरोप
एमालेले सरकार संरक्षित राजनीतिक दलका कार्यकर्ताले सामाजिक सञ्जालको दुरुपयोग गर्दै भ्रम फैलाउने, साइबर बुलिङ गर्ने तथा सामाजिक सद्भाव भड्काउने गतिविधि गरिरहेको आरोपसमेत लगाएको छ।
सरकारको असफलता र जनताले भोगिरहेका समस्याबाट ध्यान मोड्न सामाजिक सञ्जालमार्फत यस्ता गतिविधि भइरहेको एमालेको दाबी छ। पार्टीले यस्ता गतिविधिको भर्त्सना गर्दै सामाजिक सद्भाव कायम राख्न सबै पक्ष जिम्मेवार बन्नुपर्ने धारणा व्यक्त गरेको छ।
भ्रामक सामग्री सार्वजनिक गर्ने चेतावनी
एमालेले भ्रम र दुष्प्रचारको राजनीति लामो समयसम्म नचल्ने दाबी गर्दै सामाजिक सञ्जालमा फैलाइएका भ्रामक सामग्री तथा त्यसमा संलग्न व्यक्तिहरूको विवरण प्रमाणसहित सार्वजनिक गर्दै जाने चेतावनी दिएको छ।
प्रेस नोटमार्फत एमालेले सरकारलाई जनताका वास्तविक समस्याबाट पन्छिनुभन्दा आफ्ना काम र कमजोरीबारे जवाफ दिन आग्रह गरेको छ।
एमालेले ‘जनतालाई भ्रमित पार्ने होइन, आफ्ना कमजोरीको जवाफ दिने साहस गर’ भन्दै सरकारलाई चुनौती दिएको छ।
यससँगै एमालेले चाडपर्वको समयमा दैनिक उपभोग्य वस्तुको सहज आपूर्ति, मूल्य नियन्त्रण, कालोबजारी नियन्त्रण तथा ग्यासलगायत अत्यावश्यक वस्तुको व्यवस्थापनमा सरकारले प्रभावकारी कदम चाल्नुपर्नेमा जोड दिएको छ।
