काठमाडौँ । रसुवास्थित भोटेकोशी नदीमा गएको विनाशकारी बाढीबाट प्रभावित नागरिकको उद्धार तथा राहतका लागि कतार सरकारले अत्यावश्यक राहत सामग्री नेपाल पठाएको छ । बाढी तथा विपद्मा परेका नागरिकलाई तत्काल आवश्यक पर्ने सामग्रीसहित कतार एअरको जहाज नेपाल आएको हो ।
बाढी प्रभावित क्षेत्रका नागरिकका लागि अत्यावश्यक राहतजन्य सामग्री लिएर आएको कतार एअरको जहाज आज अपराह्न त्रिभुवन अन्तर्राष्ट्रिय विमानस्थलमा अवतरण गरेको हो । विमानस्थलमा आयोजित कार्यक्रममा नेपालका लागि कतारी राजदूत मिशाल मोहम्मद अल अन्सारीले उक्त राहत सामग्री विज्ञान, प्रविधि तथा नवप्रवर्तनमन्त्री महावीर पुनलाई हस्तान्तरण गरेका छन् ।
नेपालस्थित कतारी दूतावासका अनुसार भोटेकोशी–त्रिशूली नदीमा आएको विनाशकारी बाढीका कारण नेपाल ठूलो धनजनको क्षतिसहित गम्भीर विपद्को सामना गरिरहेको अवस्थामा कतार सरकारले नेपालप्रति ऐक्यबद्धता जनाउँदै अत्यावश्यक राहत सामग्री पठाएको हो ।
दूतावासले विपद्का कारण प्रभावित नागरिकको अवस्था अत्यन्तै कठिन बनेको भन्दै मानवीय सहयोगका रूपमा राहत सामग्री पठाइएको जनाएको छ । बाढीका कारण नदी तटीय क्षेत्रका धेरै बस्ती प्रभावित भएका छन् भने ठूलो संख्यामा नागरिक विस्थापित भएका छन् ।
रसुवामा आएको बाढीले घर, सडक, पुल, विद्युत् तथा सञ्चार संरचनामा ठूलो क्षति पुर्याएको छ । नदीको तीव्र बहावका कारण कतिपय स्थानमा बस्ती तथा खेतीयोग्य जमिनसमेत बगरमा परिणत भएका छन् । बाढीपछि प्रभावित क्षेत्रमा खाद्यान्न, स्वास्थ्य सामग्री, अस्थायी बसोबास तथा अन्य अत्यावश्यक सामग्रीको आवश्यकता बढेको छ ।
बाढीमा परी ठूलो संख्यामा नागरिकको मृत्यु भएको, सयौँ घाइते भएको तथा धेरै व्यक्ति अझै सम्पर्कविहीन रहेको अवस्थामा उद्धार तथा खोजी कार्य जारी छ । प्रभावित क्षेत्रमा तत्काल राहत पुर्याउन नेपाल सरकार, सुरक्षा निकाय, स्थानीय तह, विभिन्न संघसंस्था तथा मित्रराष्ट्रहरूले सहयोग गरिरहेका छन् ।
कतारबाट आएको राहत सामग्रीले बाढी प्रभावित नागरिकलाई तत्काल आवश्यक पर्ने सामग्रीको व्यवस्थापनमा सहयोग पुग्ने अपेक्षा गरिएको छ । विपद्का कारण कठिन अवस्थामा रहेका नागरिकलाई मानवीय सहायता उपलब्ध गराउने उद्देश्यले कतारले गरेको सहयोगप्रति नेपाली पक्षले आभार व्यक्त गरेको छ ।
भोटेकोशी नदीमा आएको बाढीपछि नेपालमा अन्तर्राष्ट्रिय समुदायबाट समेत सहयोग तथा ऐक्यबद्धता प्राप्त भइरहेको छ । विभिन्न मित्रराष्ट्र तथा अन्तर्राष्ट्रिय संस्थाले उद्धार, राहत, स्वास्थ्य सेवा तथा पुनःस्थापनाका लागि सहयोग उपलब्ध गराउने प्रतिबद्धता जनाएका छन् ।
नेपाल सरकारले प्राप्त हुने अन्तर्राष्ट्रिय सहायता प्रभावित क्षेत्र र पीडित नागरिकको आवश्यकताका आधारमा परिचालन गर्ने जनाएको छ । अहिले प्राथमिकतामा उद्धार, घाइतेको उपचार, सम्पर्कविहीनको खोजी, शव व्यवस्थापन तथा प्रभावित नागरिकलाई अत्यावश्यक राहत उपलब्ध गराउने कार्य रहेको छ ।
भोटेकोशी–त्रिशूली बाढीले पुर्याएको क्षतिको पुनःस्थापना तथा पुनर्निर्माणका लागि दीर्घकालीन सहयोग आवश्यक पर्ने देखिएको छ । प्रारम्भिक उद्धार तथा राहतपछि प्रभावित बस्तीको पुनःस्थापना, क्षतिग्रस्त पूर्वाधार निर्माण र जीविकोपार्जन पुनःस्थापनामा समेत सरकार र अन्तर्राष्ट्रिय समुदायबीच सहकार्य आवश्यक हुने देखिएको छ ।
कतार सरकारबाट प्राप्त राहत सामग्री तत्कालीन मानवीय आवश्यकतालाई सम्बोधन गर्न महत्वपूर्ण सहयोग बन्ने अपेक्षा गरिएको छ । नेपाल सरकारले मित्रराष्ट्र तथा सहयोगी संस्थाबाट प्राप्त हुने सहयोगलाई प्रभावकारी रूपमा परिचालन गर्दै बाढी प्रभावित नागरिकसम्म पुर्याउने प्रयासलाई निरन्तरता दिने जनाएको छ ।
