काठमाडौँ । रसुवाको भोटेकोसी नदीमा आएको विनाशकारी बाढीपछि रसुवा, नुवाकोट, धादिङ, गोरखा, चितवन र तनहुँ जिल्लाका विभिन्न सरकारी तथा अन्य कार्यालयमा कार्यरत सुदूरपश्चिम प्रदेशका १३७ जना अझै सम्पर्कविहीन रहेका छन्।
सुदूरपश्चिम प्रदेश आपत्कालीन कार्य सञ्चालन केन्द्रका अनुसार सम्पर्कविहीन हुनेमा १४ जना महिला र १२३ जना पुरुष रहेका छन्। बाढीपछि सम्बन्धित जिल्लामा कार्यरत कर्मचारी तथा अन्य व्यक्तिहरूसँग सम्पर्क स्थापित हुन नसकेपछि उनीहरूको अवस्थाबारे खोजी तथा जानकारी सङ्कलन भइरहेको छ।
पछिल्लो विवरणअनुसार कैलालीका ६ महिला र ५७ पुरुष गरी ६३ जना सम्पर्कविहीन छन्। त्यस्तै, कञ्चनपुरका १ महिला र ३० पुरुष गरी ३१ जना, डडेल्धुराका ११ पुरुष तथा बैतडीका १ महिला र ७ पुरुष सम्पर्कविहीन रहेको केन्द्रले जनाएको छ।
यसैगरी दार्चुलाका ३ पुरुष, बझाङका २ पुरुष, बाजुराका ५ महिला र ९ पुरुष, अछामका २ पुरुष तथा डोटीका १ महिला र २ पुरुष अझै सम्पर्कमा आउन नसकेको विवरणमा उल्लेख छ।
बाढीपछि सम्पर्कविहीन भएका व्यक्तिहरूमध्ये भने ३४ जना सम्पर्कमा आइसकेका छन्। सम्पर्कमा आउनेमा २ जना महिला र ३२ जना पुरुष रहेका छन्।
सम्पर्कमा आएकामध्ये कैलालीका १९ पुरुष रहेका छन्। त्यस्तै, कञ्चनपुरका १ महिला र ८ पुरुष गरी ९ जना तथा डडेल्धुराका १ महिला र ५ पुरुष गरी ६ जना सम्पर्कमा आएको प्रदेश आपत्कालीन कार्य सञ्चालन केन्द्रले जनाएको छ।
बाढीपछि ठूलो सङ्ख्यामा मानिस सम्पर्कविहीन भएपछि उनीहरूको अवस्था पत्ता लगाउन सम्बन्धित निकायले खोजी तथा समन्वयलाई तीव्रता दिएको छ। प्रदेश आपत्कालीन कार्य सञ्चालन केन्द्रले सम्बन्धित जिल्ला प्रशासन कार्यालय, सुरक्षा निकाय तथा अन्य सरोकारवाला निकायसँग समन्वय गरी सम्पर्कविहीन व्यक्तिहरूबारे थप विवरण सङ्कलन गरिरहेको जनाएको छ।
बाढीका कारण सञ्चार तथा यातायातका माध्यम प्रभावित भएका क्षेत्रमा सम्पर्क स्थापित गर्न कठिनाइ भइरहेको हुन सक्ने भएकाले प्रारम्भिक विवरणमा सम्पर्कविहीन देखिएका केही व्यक्ति पछि सम्पर्कमा आउन सक्ने अपेक्षा गरिएको छ।
प्रदेश आपत्कालीन कार्य सञ्चालन केन्द्रले सम्पर्कविहीन व्यक्तिहरूको अवस्थाबारे थप विवरण प्राप्त गर्ने र खोजी कार्यलाई निरन्तरता दिने जनाएको छ। साथै, सम्बन्धित परिवार तथा आफन्तलाई आधिकारिक निकायबाट प्राप्त सूचनालाई आधार बनाउन आग्रह गरिएको छ।
