एजेन्सी। पाकिस्तानका पूर्वप्रधानमन्त्री इमरान खानलाई शुक्रबार बिहान इस्लामाबादस्थित शिफा इन्टरनेशनल अस्पतालमा स्वास्थ्य परीक्षण गराएर पुनः जेल पठाइएको छ।
पाकिस्तानका सूचनामन्त्री अताउल्लाह तरारका अनुसार खानको स्वास्थ्य परीक्षण नेत्ररोग विशेषज्ञ, मुटुरोग विशेषज्ञ र फिजिसियनसहितको चिकित्सकीय टोलीले गरेको थियो। परीक्षणपछि चिकित्सकहरूले खानको अवस्था ‘चिकित्सकीय रूपमा तन्दुरुस्त’ रहेको निष्कर्ष दिएको बीबीसीले जनाएको छ।
खानको स्वास्थ्य अवस्थाबारे लामो समयदेखि विवाद हुँदै आएको थियो। उनका कानुनी प्रतिनिधिहरूले पूर्वप्रधानमन्त्री खान विभिन्न स्वास्थ्य समस्याबाट पीडित भए पनि आवश्यक विशेषज्ञ चिकित्सकबाट उचित उपचार पाउन नसकेको दाबी गर्दै आएका थिए। यही विषयलाई लिएर खानका वकिलहरूले अदालतमा समेत स्वास्थ्य परीक्षण तथा विशेषज्ञ उपचारको माग गरेका थिए।
यसैबीच, पाकिस्तानको सर्वोच्च अदालतले गएको मंगलबार खानलाई ४८ घण्टाभित्र अस्पताल लगेर स्वास्थ्य परीक्षण गराउन आदेश दिएको थियो। अदालतको आदेशपछि उनलाई शुक्रबार बिहान इस्लामाबादस्थित शिफा इन्टरनेशनल अस्पताल लगिएको हो।
अस्पतालमा विभिन्न विशेषज्ञ चिकित्सकको टोलीले उनको स्वास्थ्य परीक्षण गरेको थियो। परीक्षणका क्रममा आँखासम्बन्धी समस्या, मुटुको अवस्था तथा समग्र शारीरिक स्वास्थ्यबारे परीक्षण गरिएको बताइएको छ। परीक्षणपछि चिकित्सकहरूले तत्काल अस्पतालमै राखेर उपचार गर्नुपर्ने अवस्था नरहेको निष्कर्ष दिएपछि उनलाई पुनः जेल पठाइएको हो।
इमरान खान सन् २०२३ देखि भ्रष्टाचारसम्बन्धी मुद्दामा जेलमा रहँदै आउनुभएको छ। उहाँले आफूविरुद्ध लगाइएका आरोपहरू राजनीतिक प्रतिशोधबाट प्रेरित भएको दाबी गर्दै आउनुभएको छ। खान पक्षले पनि उहाँमाथि राजनीतिक रूपमा प्रेरित मुद्दा लगाइएको भन्दै निरन्तर विरोध गर्दै आएको छ।
खान पाकिस्तानको राजनीतिमा प्रभावशाली नेताका रूपमा परिचित हुनुहुन्छ। उहाँको नेतृत्वमा पाकिस्तान तहरीक–ए–इन्साफ (पीटीआई) पार्टीले पाकिस्तानको राजनीतिमा महत्वपूर्ण प्रभाव पारेको थियो। सन् २०१८ मा प्रधानमन्त्री बनेका खानले सन् २०२२ सम्म पाकिस्तान सरकारको नेतृत्व गर्नुभएको थियो।
प्रधानमन्त्री पदबाट हटेपछि खानले देशव्यापी राजनीतिक अभियान सञ्चालन गर्नुभएको थियो। त्यसक्रममा उहाँका समर्थकहरूले सरकारविरुद्ध विभिन्न प्रदर्शनसमेत गरेका थिए। त्यसपछि उहाँमाथि विभिन्न कानुनी मुद्दा अघि बढाइएको थियो।
इमरान खान राजनीतिमा आउनुअघि पाकिस्तानका चर्चित क्रिकेट खेलाडी हुनुहुन्थ्यो। उहाँले पाकिस्तान राष्ट्रिय क्रिकेट टोलीको कप्तानी गर्दै सन् १९९२ मा देशलाई क्रिकेट विश्वकप जिताउनुभएको थियो। क्रिकेटबाट सन्यास लिएपछि उहाँ राजनीतिमा सक्रिय हुनुभएको हो।
सन् २०१८ मा प्रधानमन्त्री बनेपछि खानले पाकिस्तानमा राजनीतिक तथा आर्थिक सुधार गर्ने प्रतिबद्धता व्यक्त गर्नुभएको थियो। तर, आर्थिक संकट, राजनीतिक विवाद तथा विपक्षी दलसँगको तीव्र संघर्षका बीच उहाँको सरकार सन् २०२२ मा संसद्मा अविश्वासको प्रस्तावमार्फत हटेको थियो।
हाल जेलमा रहेका खानको स्वास्थ्य अवस्थालाई लिएर उनका समर्थक तथा कानुनी टोलीले पटक–पटक चिन्ता व्यक्त गर्दै आएका छन्। सर्वोच्च अदालतको आदेशपछि गरिएको पछिल्लो स्वास्थ्य परीक्षणले भने उनी चिकित्सकीय रूपमा तन्दुरुस्त रहेको सरकारी पक्षले जनाएको छ।
खानलाई अस्पतालबाट पुनः जेल पठाइएपछि उनको उपचार तथा स्वास्थ्य अवस्थाबारे थप विवाद हुने वा नहुने विषयमा पनि चासो बढेको छ। यससँगै उनको कानुनी तथा राजनीतिक भविष्यलाई लिएर पाकिस्तानमा चासो कायम रहेको छ।
