काठमाडौं । नेकपा (एमाले) का सांसद लक्ष्मीप्रसाद पोखरेलले संसदको गरिमा र मर्यादा कायम गर्न सांसद, प्रधानमन्त्री तथा मन्त्रीका लागि औपचारिक पोशाक अनिवार्य गर्न माग गर्नुभएको छ ।
सोमबार प्रतिनिधिसभाको बैठकमा बोल्दै सांसद पोखरेलले संसदमा टिसर्ट, ज्याकेट, सर्ट, कुर्ता, ब्लाउज, सललगायतका अनौपचारिक पोशाकमा संसदको लोगो प्रयोग गर्न रोक लगाउनुपर्ने बताउनुभयो ।
उहाँले सांसदका लागि सांस्कृतिक वा राष्ट्रिय पोशाक अथवा औपचारिक पोशाक अनिवार्य गर्न सभामुख डोलप्रसाद अर्यालको ध्यानाकर्षण गराउनुभयो । प्रधानमन्त्री तथा मन्त्रीलाई समेत टिसर्ट लगाएर संसद् भवन प्रवेश गर्न रोक लगाउनुपर्ने उहाँको माग छ ।
संसदीय पोशाकसम्बन्धी अनुशासन कायम गर्न सभामुखबाट आवश्यक रुलिङ हुनुपर्नेमा जोड दिँदै सांसद पोखरेलले अन्य मुलुकका संसदमा पोशाकसम्बन्धी अभ्यासको उदाहरणसमेत प्रस्तुत गर्नुभयो ।
‘सन् २०२१ को फेब्रुअरी ९ मा न्युजिल्यान्डको संसदमा रविरी वैतिती नामका सांसदले उपनिवेशकालीन पोशाक भन्दै टाई लगाउन अस्वीकार गरेकाले उनलाई संसदीय रुलिङमार्फत सदनबाट निष्कासन गरिएको थियो,’ उहाँले भन्नुभयो ।
त्यस्तै, सन् २०२३ मा क्यानडाको संसदमा पोशाकसम्बन्धी मापदण्ड लागू गर्न संसदीय रुलिङ भएको उदाहरण दिँदै उहाँले नेपालमा पनि संसदको मर्यादा कायम गर्ने गरी स्पष्ट पोशाकसम्बन्धी व्यवस्था गर्नुपर्ने बताउनुभयो ।
‘संसदको गरिमा कायम गर्न सांस्कृतिक पोशाक वा राष्ट्रिय पोशाक वा औपचारिक पोशाक अनिवार्य गरियोस् । प्रधानमन्त्री र मन्त्रीलाई टिसर्ट लगाएर संसदभित्र प्रवेश गर्न रोक लगाइयोस्,’ उहाँले भन्नुभयो ।
सांसद पोखरेलले कोट र हाफ कोटबाहेक टिसर्ट, ज्याकेट, सर्ट, कुर्ता, ब्लाउज, सललगायतका पोशाकमा संसदको लोगो प्रयोग गर्न रोक लगाउनुपर्ने मागसमेत गर्नुभयो ।
उहाँले संसदीय पोशाकसम्बन्धी स्पष्ट अनुशासन कायम गर्न सभामुखबाट आवश्यक रुलिङ जारी गर्न आग्रह गर्नुभयो ।
