काठमाडौं । देशभर मनसुनी वायुको प्रभाव कायम रहँदा आज पनि नेपालका अधिकांश क्षेत्रमा वर्षाको सम्भावना रहेको छ। जल तथा मौसम पूर्वानुमान महाशाखाले मनसुनको न्यून चापीय रेखा पश्चिम नेपालमा सरदर स्थानभन्दा दक्षिणतिर तथा पूर्वी नेपालमा सरदर स्थानकै आसपास रहेकाले वर्षा गराउने प्रणाली सक्रिय रहेको जनाएको छ।
महाशाखाका अनुसार शनिबार बिहानसम्म लुम्बिनी प्रदेशका तराई क्षेत्रमा आंशिक बदली रहेको छ भने बाँकी अधिकांश भूभागमा सामान्यदेखि पूर्ण बदली रहेको छ। बागमती प्रदेशका केही स्थान तथा कोशी, गण्डकी, कर्णाली र सुदूरपश्चिम प्रदेशका एक–दुई स्थानमा हल्कादेखि मध्यम वर्षा भइरहेको छ।
दिउँसो देशभर वर्षाको सम्भावना
मौसमविद्का अनुसार आज दिउँसो देशभर सामान्यदेखि पूर्ण बदली रहनेछ। हिमाली क्षेत्रका केही स्थान तथा पहाडी भूभागका धेरै स्थानमा मध्यम वर्षा हुने सम्भावना रहेको छ। उच्च हिमाली क्षेत्रमा हल्का हिमपात पनि हुन सक्ने अनुमान गरिएको छ।
यस्तै, तराईका केही स्थानमा मेघगर्जन र चट्याङसहित मध्यम वर्षा हुने सम्भावना रहेको छ। विशेषगरी बागमती, गण्डकी, कर्णाली र सुदूरपश्चिम प्रदेशका पहाडी जिल्लाका एक–दुई स्थानमा भारी वर्षा हुन सक्ने भएकाले उच्च सतर्कता अपनाउन मौसमविद्ले आग्रह गरेका छन्।
राति पनि वर्षा जारी रहने
महाशाखाका अनुसार आज राति पनि देशभर सामान्यदेखि पूर्ण बदली रहनेछ। हिमाली र पहाडी क्षेत्रका केही स्थान तथा तराईका धेरै स्थानमा मेघगर्जन र चट्याङसहित मध्यम वर्षा हुने सम्भावना छ।
त्यसैगरी कोशी, बागमती र गण्डकी प्रदेशका हिमाली, पहाडी तथा तराई क्षेत्र, साथै मधेस, लुम्बिनी र सुदूरपश्चिम प्रदेशका तराईका एक–दुई स्थानमा भारी वर्षा हुन सक्ने पूर्वानुमान गरिएको छ।
बाढी, पहिरो र डुबानको जोखिम
महाशाखाले भारी वर्षा हुन सक्ने क्षेत्रमा नदी, खोला र खोल्सामा पानीको बहाव एक्कासि बढ्न सक्ने, गेग्रान बहाव, बाढी, पहिरो तथा डुबानको जोखिम उच्च रहने जनाएको छ। पहाडी क्षेत्रमा सडक अवरुद्ध हुने, नदी किनारका बस्ती जोखिममा पर्न सक्ने तथा कमजोर भूभागमा पहिरो खस्ने सम्भावना रहेको उल्लेख गरिएको छ।
यातायात र जनजीवनमा असर पर्ने सम्भावना
निरन्तर वर्षाका कारण दैनिक जनजीवन, कृषि, स्वास्थ्य सेवा, पर्यटन, पर्वतारोहण, सडक तथा हवाई यातायातमा आंशिकदेखि मध्यम असर पर्न सक्ने महाशाखाले जनाएको छ। विशेषगरी पहाडी तथा हिमाली जिल्लामा यात्रा गर्ने यात्रुले मौसम र सडकको अवस्था बुझेर मात्रै यात्रा गर्न अनुरोध गरिएको छ।
सतर्कता अपनाउन आग्रह
जल तथा मौसम पूर्वानुमान महाशाखाले सर्वसाधारणलाई बाढी तथा पहिरोको जोखिम रहेका क्षेत्रमा अनावश्यक आवतजावत नगर्न, नदी तथा खोलानजिक सतर्क रहन, मौसमसम्बन्धी आधिकारिक सूचना नियमित रूपमा पछ्याउन तथा स्थानीय प्रशासन र सुरक्षा निकायले जारी गर्ने निर्देशनको पालना गर्न आग्रह गरेको छ। साथै, जोखिमयुक्त क्षेत्रमा रहेका स्थानीय तह तथा सम्बन्धित निकायलाई सम्भावित विपद्को पूर्वतयारी अवस्थामा रहन पनि अनुरोध गरिएको छ।
