काठमाडौं । धितोपत्र बजारमा आज सेयर कारोबार उत्साहजनक देखिएको छ। नेपाल स्टक एक्सचेञ्ज (नेप्से) परिसूचक १२ दशमलव ९६ अङ्कले बढेर दुई हजार ६८५ दशमलव ५४ अङ्कमा पुगेको छ।
आज ठूला कम्पनीहरूको कारोबार मापन गर्ने सेन्सेटिभ परिसूचक दुई दशमलव ४४ अङ्कले वृद्धि भई ४७० दशमलव १३ अङ्कमा पुगेको छ। त्यसैगरी, फ्लोट सूचक एक अङ्कले बढेर १८४ दशमलव ५९ अङ्कमा पुगेको छ भने सेन्सेटिभ फ्लोट सूचक शून्य दशमलव ७७ अङ्कले बढेर १५९ दशमलव ४८ अङ्क कायम भएको छ।
नेप्सेका अनुसार आज विभिन्न कम्पनीका ८८ लाख ५१ हजार २१६ कित्ता सेयर खरिद–बिक्री हुँदा कुल कारोबार रकम तीन अर्ब ७५ करोड ९७ लाख २२ हजार ३४० रुपैयाँ पुगेको छ।
आज कारोबार भएका १३ उपसमूहमध्ये ११ उपसमूहको सूचक बढेको छ भने दुई उपसमूहमा गिरावट आएको छ। बजारमा १८० कम्पनीको सेयर मूल्य बढ्दा ८२ कम्पनीको सेयर मूल्य घटेको छ। १३ कम्पनीको सेयर मूल्य भने स्थिर रहेको छ।
आजको कारोबारमा एभरेष्ट कलर लिमिटेड, लक्ष्मी भ्यालु फण्ड र जोशी हाइड्रोपावर कम्पनीका लगानीकर्ताले सबैभन्दा बढी लाभ कमाएका छन्। यता बोटलर्स नेपाल (तराई) लिमिटेड, कालिञ्चोक हाइड्रोपावर कम्पनी र कर्पोरेट डेभलपमेन्ट बैंकका लगानीकर्ताले सबैभन्दा बढी घाटा बेहोरेका छन्।
