काठमाडौं । प्रधानमन्त्री बालेन शाहले आज (बिहीबार) साँझ देशबासीका नाममा विशेष सम्बोधन गर्ने तयारी गरेका छन्। प्रधानमन्त्रीको सचिवालय स्रोतका अनुसार सम्बोधनको तयारी अन्तिम चरणमा पुगेको छ भने सम्बोधनमार्फत समसामयिक राष्ट्रिय विषयमा सरकारको धारणा सार्वजनिक गरिने अपेक्षा गरिएको छ।
सचिवालयका अनुसार सम्बोधनको मस्यौदा र आवश्यक तयारी लगभग पूरा भइसकेको भए पनि सम्बोधन गर्ने ठ्याक्कै समय भने अझै तय भएको छैन। समय निर्धारण भएपछि औपचारिक रूपमा जानकारी गराइने बताइएको छ।
पछिल्ला केही दिनयता देशका विभिन्न क्षेत्रमा विकसित घटनाक्रम, विशेषगरी सुनसरीको देवानगञ्ज–कप्तानगञ्ज क्षेत्रमा भएको हिंसात्मक घटनापछि प्रधानमन्त्रीको सम्भावित सम्बोधनलाई निकै चासोका साथ हेरिएको छ। यद्यपि प्रधानमन्त्रीको सचिवालयले सम्बोधनको विषयवस्तुबारे कुनै आधिकारिक जानकारी सार्वजनिक गरेको छैन।
यसैबीच, बिहीबार अपराह्न प्रधानमन्त्री शाहसँग गृहमन्त्री सुधन गुरूङले भेटवार्ता गर्नुभएको थियो। प्रधानमन्त्रीसँगको भेटपछि गृहमन्त्री गुरूङ घटनास्थलको सुरक्षा अवस्थाबारे स्थलगत अनुगमन तथा आवश्यक समन्वयका लागि सुनसरी प्रस्थान गर्ने कार्यक्रम रहेको प्रधानमन्त्री सचिवालय स्रोतले जनाएको छ।
सरकारले सुनसरी घटनापछि सुरक्षा व्यवस्था थप कडा बनाएको छ भने प्रभावित क्षेत्रमा उच्च सतर्कता अपनाइएको छ। घटनाको अनुसन्धान जारी रहेकाले सरकारको आगामी कदम र सुरक्षा रणनीतिबारे प्रधानमन्त्रीको सम्बोधनमा धारणा आउने अनुमान गरिएको छ।
यद्यपि प्रधानमन्त्री कार्यालयले सम्बोधनको विषय, उद्देश्य वा समेटिने एजेन्डाबारे कुनै औपचारिक विवरण सार्वजनिक गरेको छैन। त्यसैले सम्बोधनमा के–कस्ता विषय उठाइनेछन् भन्ने विषय अहिले खुलाइएको छैन।
देशबासीको ध्यान प्रधानमन्त्रीको सम्भावित सम्बोधनतर्फ केन्द्रित भएको छ। सम्बोधनमा पछिल्ला राष्ट्रिय घटनाक्रम, शान्ति–सुरक्षा, सामाजिक सद्भाव, सरकारका आगामी योजना वा अन्य समसामयिक विषय समेटिने वा नसमेटिनेबारे भने औपचारिक सम्बोधनपछि मात्रै स्पष्ट हुने अपेक्षा गरिएको छ।
