काठमाडौं । काठमाडौं उपत्यकामा पछिल्लो २४ घण्टामा ट्राफिक नियम उल्लंघन गर्ने २ हजार ५५० जना सवारीचालक कारबाहीमा परेका छन्।
काठमाडौं उपत्यका ट्राफिक प्रहरी कार्यालयका अनुसार विभिन्न सवारी नियम उल्लंघन गरेको आरोपमा गरिएको कारबाहीबाट राज्यकोषमा १७ लाख २४ हजार ५०३ रुपैयाँ राजस्व दाखिला भएको छ।
ट्राफिक प्रहरीले मादक पदार्थ सेवन (मापसे) गरी सवारी चलाउने १०२ जना, नियमविपरीत ‘राइड सेयरिङ’ गर्ने १४२ जना, ट्राफिक संकेत बत्ती उल्लंघन गर्ने १४० जना र तीव्र गतिमा सवारी चलाउने २०७ जना चालकलाई कारबाही गरेको जनाएको छ।
यस्तै, लेन अनुशासन पालना नगर्ने ५६ जना, निषेधित क्षेत्रमा हर्न बजाउने १०८ जना, निर्धारित मापदण्डभन्दा बढी धुवाँ फाल्ने १४ वटा सवारीसाधन तथा सवारीको अवस्था जाँच नगरी सडकमा सञ्चालन गरिएका ३५ वटा सवारीसाधन कारबाहीमा परेका छन्।
त्यसैगरी अन्य विभिन्न सवारी नियम उल्लंघन गर्ने १ हजार ७४६ जना चालकलाई समेत ट्राफिक प्रहरीले कारबाही गरेको जनाएको छ।
ट्राफिक प्रहरीले सडक सुरक्षा कायम गर्न, दुर्घटना न्यूनीकरण गर्न र नियम पालना गराउन नियमित अनुगमन तथा कारबाही अभियान सञ्चालन गर्दै आएको छ। नियम उल्लंघन गर्ने सवारीचालकविरुद्ध आगामी दिनमा पनि कडाइका साथ कारबाही जारी रहने ट्राफिक प्रहरीले जनाएको छ।
