काठमाडाैं । नेकपा एमालेले संसदीय दल र सचिवालयको बैठक बोलाएको छ ।
साेमबार पार्टी उपाध्यक्ष विष्णुप्रसाद पौडेललाई सम्पत्ति शुद्धीकरणको मुद्दामा सुर्खेतबाट पक्राउ गरिएपछि त्यसबारे धारणा बनाउन छुट्टाछुट्टै बैठक बोलाइएको हो । संसदीय दलको बैठक पनि मंगलबार दिउँसो २ बजे च्यासलस्थित पार्टी केन्द्रीय कार्यालयमा बस्ने गरेर बाेलाइएकाे छ । साथै मंगलबार साँझ ६ बजे पार्टीको अध्यक्ष केपी ओली निवास गुण्डुमा सचिवालय बैठक पनि बोलाएको हो ।
बैठक उपाध्यक्ष पौडेल पक्राउ प्रकरणबारे केन्द्रित हुने एमालले जनाएकाे छ । त्यसबाहेक बैठकमा समसामयिक राजनीतिबारे पनि छलफल हुने भएकाे हाे। यसअघि एमालेले उपाध्यक्ष पौडेलको गिरफ्तारीविरुद्ध एमालेले राजनीतिक प्रतिवाद गर्ने निर्णय गरिसकेको छ । एमालेले पौडेल पक्राउलाई प्रतिशोधपूर्ण भन्दै सस्तो लोकप्रियताका लागि सरकारको निर्देशनमा यो कार्यको कानुनी र राजनीतिक रूपमा दृढतापूर्वक प्रतिवाद गरिने जनाएको हो ।
उपाध्यक्ष पौडेललाई सुर्खेतबाट गिरफ्तार गरिएको घटनालाई सरकारको ‘अराजनीतिक, अलोकतान्त्रिक र नाङ्गो प्रतिशोधको पराकाष्ठा’ भन्दै एमालेले कडा विरोध गरेकाे हाे । पार्टी अध्यक्ष केपी शर्मा ओलीद्वारा साेमबार राति जारी प्रेस विज्ञप्तिमा पौडेलको गिरफ्तारीलाई गैरकानूनी, बदनियतपूर्ण र राजनीतिक प्रतिशोधबाट प्रेरित कदमका रूपमा चित्रित गरिएको छ ।
साङ्गठनिक कार्यक्रमका शिलशिलामा सुर्खेतमा रहेका उपाध्यक्ष पौडेललाई सरकारले ‘अपहरणको शैलीमा’ गिरफ्तार गरेको एमालेको ठहर छ ।
