काठमाडौँ । दाङको तुलसीपुर उपमहानगरपालिकास्थित गुल्म चोकमा सोमबार बिहान भएको सवारी दुर्घटनामा बाबु–छोराको मृत्यु भएको छ भने एक महिला घाइते भएकी छन्।
प्रहरीका अनुसार बिहान करिब साढे ५ बजे रा १ ख २१९२ नम्बरको टिपरले रा ४ प ३३९० नम्बरको मोटरसाइकललाई ठक्कर दिएको थियो। दुर्घटनामा एउटै परिवारका तीन जना सवार मोटरसाइकल गम्भीर रूपमा क्षतिग्रस्त भएको थियो।
दुर्घटनामा मोटरसाइकल चालक लमही नगरपालिका–५ निवासी ३५ वर्षीय मनोज नेपाली र उनका ५ वर्षीय छोरा मिनराज नेपाली गम्भीर घाइते भएका थिए। दुवैलाई उपचारका लागि नेपालगञ्जस्थित अस्पताल लगिएको भए पनि उपचारकै क्रममा मृत्यु भएको प्रहरीले जनाएको छ।
प्रहरीका अनुसार मिनराज नेपालीलाई बिहान ९ः४० बजे र मनोज नेपालीलाई १०ः०२ बजे चिकित्सकले मृत घोषणा गरेका थिए।
दुर्घटनामा घाइते भएकी मनोजकी श्रीमती ३४ वर्षीया अनुसा नेपालीको उपचार भइरहेको छ। उनको स्वास्थ्य अवस्थाबारे थप विवरण सार्वजनिक गरिएको छैन।
घटनापछि टिपर चालकलाई इलाका प्रहरी कार्यालय तुलसीपुरले नियन्त्रणमा लिएको छ। दुर्घटनाको कारणबारे अनुसन्धान भइरहेको प्रहरीले जनाएको छ।
यस दुर्घटनाले एकै परिवारमा ठूलो शोक निम्त्याएको छ। स्थानीयवासीले सडक सुरक्षामा थप ध्यान दिन र तीव्र गतिका सवारी साधनमाथि प्रभावकारी निगरानी गर्न सम्बन्धित निकायसँग माग गरेका छन्।
