सङ्खुवासभा । उत्तर–दक्षिण कोशी राजमार्गअन्तर्गत सङ्खुवासभाको भोटखोला गाउँपालिका–४ क्षेत्रमा सुख्खा पहिरो खस्दा खाँदबारी–किमाथाङ्का सडकखण्ड अवरुद्ध भएको छ।
जिल्ला प्रहरी कार्यालय सङ्खुवासभाका सूचना अधिकारी प्रहरी निरीक्षक धनबहादुर राजवंशीका अनुसार माथिबाट खसेको ठूला–ठूला ढुङ्गासहितको सुख्खा पहिरोले सडक पूर्णरूपमा अवरुद्ध बनाएको हो। पहिरोका कारण करिब १५ मिटर कच्ची सडकखण्ड पुरिएको प्रहरीले जनाएको छ।
सडक अवरुद्ध भएपछि खाँदबारीबाट भोटखोलाको च्याम्ताङ तथा किमाथाङ्कातर्फ आवतजावत गर्ने सवारी साधनहरू रोकिएका छन्। यात्रु तथा स्थानीयवासीलाई समेत आवागमनमा समस्या परेको छ।
प्रहरीका अनुसार पहिरो हटाउने कार्य जारी रहेको छ। सम्बन्धित निकाय र स्थानीय तहसँग समन्वय गरी सडक खुलाउने प्रयास भइरहेको जनाइएको छ। यद्यपि पहिरोमा ठूला चट्टान र ढुङ्गाहरू मिसिएको कारण सडक सञ्चालनमा ल्याउन केही समय लाग्न सक्ने अनुमान गरिएको छ।
वर्षायाम सुरु भएसँगै पहाडी जिल्लाहरूमा पहिरोको जोखिम बढ्दै गएको छ। प्रशासनले सडक यात्रा गर्दा सतर्कता अपनाउन तथा मौसम र सडकको अवस्थाबारे जानकारी लिएर मात्र यात्रा गर्न सर्वसाधारणलाई आग्रह गरेको छ।
सडक खुल्नेबारे थप जानकारी प्राप्त हुनासाथ सम्बन्धित निकायले सार्वजनिक गर्ने जनाएको छ।
