काठमाडौँ । मुस्लिम धर्मावलम्बीहरूको दोस्रो महान् पर्व बकर इद अर्थात् इदुल जोहा बिहीबार देशभर श्रद्धा, उल्लास र धार्मिक आस्थाका साथ मनाइँदैछ । पर्वको अवसरमा देशका विभिन्न मस्जिद तथा इदगाहहरूमा बिहानैदेखि नमाज पढ्ने श्रद्धालुको ठूलो भीड लागेको छ ।
इस्लाम धर्मावलम्बीहरूले रमजान पर्व अर्थात् इदुल फित्र सम्पन्न भएको ७० औँ दिनपछि मनाइने यो पर्वलाई त्याग, बलिदान र समर्पणको प्रतीकका रूपमा लिने गरेका छन् । धार्मिक परम्पराअनुसार मुस्लिम समुदायका मानिसहरू बिहानै स्नान गरी नजिकैका मस्जिद तथा इदगाहमा पुगेर सामूहिक नमाज अदा गरेका छन् ।
नमाजपछि एकआपसमा शुभकामना आदानप्रदान गर्दै परिवार, आफन्त र छिमेकीबीच खुसी साटासाट गर्ने परम्परा रहेको छ । बकर इदको अवसरमा मुस्लिम समुदायले विशेष परिकार तयार पार्ने, आफन्तकहाँ भेटघाट गर्ने तथा दान–दक्षिणा दिने चलन पनि रहेको छ ।
राजधानी काठमाडौँको दरबारमार्गस्थित नेपाली जामे मस्जिद, काश्मिरी मस्जिद लगायत देशभरका मस्जिदहरूमा बिहानैदेखि श्रद्धालुको उपस्थिति बाक्लो देखिएको थियो । सुरक्षा व्यवस्थासमेत कडा पारिएको छ भने स्थानीय प्रशासनले पर्वलाई शान्तिपूर्ण रूपमा सम्पन्न गराउन आवश्यक समन्वय गरेको जनाएको छ ।
धार्मिक विश्वासअनुसार आजभन्दा करिब १४३९ वर्षअघि अल्लाहको आदेशमा हजरत इब्राहिमले आफ्ना छोरा इस्माएल अलेह सलामलाई बलिदान दिन तयार भएको घटनाको सम्झनामा यो पर्व मनाउन थालिएको हो । अन्तिम समयमा अल्लाहले इस्माएलको सट्टा अर्को जीव बलिदानका लागि पठाएको विश्वास गरिन्छ । यही घटनालाई त्याग र आस्थाको सर्वोच्च उदाहरणका रूपमा इस्लाम धर्ममा व्याख्या गरिन्छ ।
बकर इदको अवसरमा मुस्लिम समुदायले धार्मिक विधिअनुसार पशु कुर्बानी दिने परम्परा पनि निर्वाह गर्ने गर्दछन् । कुर्बानी गरिएको मासुको एक भाग गरिब तथा विपन्न समुदायलाई वितरण गर्ने धार्मिक मान्यता रहेको छ ।
यस वर्ष बकर इदको अवसरमा सरकारले बिहीबार सार्वजनिक बिदा दिएको छ । शुक्रबार पर्ने गणतन्त्र दिवस तथा त्यसपछि शनिबार र आइतबारको नियमित बिदासँग जोडिँदा लगातार चार दिन सार्वजनिक बिदा परेको छ ।
लगातारको बिदाका कारण विभिन्न सहरमा आन्तरिक यात्रुको चाप बढेको छ भने बजार तथा यातायात क्षेत्रमा पनि चहलपहल बढेको देखिएको छ । धार्मिक सहिष्णुता र सामाजिक सद्भावको सन्देश दिने बकर इद पर्वले नेपाली समाजमा आपसी एकता र भाइचाराको भावना अझ मजबुत बनाउने विश्वास गरिएको छ ।
