काठमाडौं । नेपाली कम्युनिस्ट पार्टी (नेकपा) ले प्रधानमन्त्री बालेन्द्र शाहलाई संविधानभन्दा माथि नठान्न आग्रह गर्दै संसद्प्रति उत्तरदायी बन्नुपर्ने बताएको छ ।
प्रतिनिधिसभाको विशेष समयमा बोल्दै नेकपाका प्रमुख सचेतक युवराज दुलालले प्रधानमन्त्री संसद्बाट जन्मिएको पद भएकाले सदनमा उपस्थित भएर जवाफ दिनुपर्ने धारणा राखे ।
उनले प्रधानमन्त्री शाहलाई छुट दिनुपर्ने भए त्यसबारे सत्तारुढ रास्वपाले संसद्मा स्पष्ट धारणा राख्नुपर्ने बताए । “एक मिनेट भए पनि प्रधानमन्त्री रोष्ट्रममा आएर उभिनुपर्छ,” दुलालले भने ।
दुलालले प्रधानमन्त्री केवल सत्तापक्षको नभई विपक्षीको समेत प्रधानमन्त्री भएकाले संविधान र प्रतिनिधिसभा नियमावलीअनुसार सदनलाई सम्मान गर्नुपर्ने उल्लेख गरे ।
उनले बहुमतको आडमा विपक्षीको विरोधबीच विधेयक पारित गर्ने प्रवृत्तिको आलोचना गर्दै संसद्मा बहस र छलफललाई बेवास्ता गर्न नहुने बताए । “यदि बहुमतकै आधारमा सबै निर्णय गर्ने हो भने संसद्को प्रक्रिया किन आवश्यक भयो ?” उनले प्रश्न गरे ।
दुलालले प्रतिनिधिसभा नियमावलीको व्यवस्था अनुसार प्रधानमन्त्रीले प्रश्नोत्तरका लागि सदनमा उपस्थित हुनुपर्ने भए पनि सरकारले त्यसलाई बेवास्ता गरेको आरोप लगाए ।
उनले संसद्मा विपक्षीको आवाजलाई पनि समान महत्व दिनुपर्ने उल्लेख गर्दै प्रतिपक्षले आधा नेपाली जनताको प्रतिनिधित्व गर्ने भएकाले त्यसको सम्मान गर्नुपर्ने बताए ।
