काठमाडौं । के. पी. शर्मा ओली नेतृत्त्वको नेपाल कम्युनिष्ट पार्टी (एकीकृत मार्क्सवादी-लेनिनवादी) (एमाले) भित्र आन्तरिक बहस तीव्र बनेको छ । जारी सचिवालय बैठकमा अध्यक्ष ओलीले आफूलाई नेतृत्वबाट हटाउने प्रयास भइरहेको संकेत गर्दै “कुन विधि र प्रक्रियाबाट हटाउने ?” भन्ने प्रश्न उठाएका छन् ।
जेठ ४ गतेदेखि निरन्तर जारी सचिवालय बैठक आइतबार पनि बसिरहेको छ । बैठकमा अधिकांश सचिवालय सदस्यहरूले पार्टी पुनर्गठन, नेतृत्व शैली र संगठनात्मक अवस्थाबारे आलोचनात्मक धारणा राखेपछि अध्यक्ष ओली थप दबाबमा परेको बताइएको छ । बैठकमा सहभागी एक नेताका अनुसार बहुसंख्यक सदस्यहरूको धारणा सुनेपछि ओलीले प्रत्यक्ष रूपमा नेतृत्व परिवर्तनको बहसलाई चुनौती दिएका हुन् ।
बैठकमा ओलीले राष्ट्रिय महाधिवेशन भएको ६ महिना पनि नपुगेको अवस्थामा फेरि नेतृत्व परिवर्तनको बहस उठाइनु अस्वाभाविक भएको बताएका थिए । उनले भने, “मलाई हटाउने हो भने कुन विधिबाट कसरी हटाउने ? राष्ट्रिय महाधिवेशन भएको ६ महिना पनि भएको छैन । फेरि राष्ट्रिय महाधिवेशन गर्ने कुरा त नहोला, विशेष महाधिवेशन गर्नुपर्ने होला । तीन महिनाअघि भएका तहगत अधिवेशनको अवस्था के हुन्छ ?”
सचिवालय बैठकमा अध्यक्ष ओलीले आफू केन्द्रीय कमिटी बैठक फेस गर्न तयार रहेको संकेतसमेत दिएका छन् । उनले नेताहरूलाई चुनौती दिँदै भने, “मलाई हट्नुपर्छ भन्ने हो भने केन्द्रीय कमिटी बैठकमा जाऔँ । एक–एक केन्द्रीय सदस्यसँग म पनि कुरा गर्छु ।” ओलीको यो अभिव्यक्तिलाई पार्टीभित्र शक्ति परीक्षणको संकेतका रूपमा हेरिएको छ ।
शनिबार बसेको बैठकमा पनि ओली र केही नेताहरूबीच चर्काचर्की परेको स्रोतको दाबी छ । सचिवालय सदस्यहरूले नेतृत्व हस्तान्तरण, पुस्तान्तरण र पार्टी पुनर्गठनको आवश्यकता औँल्याइरहेका बेला ओलीले आफूलाई “धेरै नसम्झाउन” आग्रह गरेका थिए । “किन सम्झाउँदै हुनुहुन्छ ? मलाई नसम्झाउनुस् । तपाईंहरूले सम्झाउनुपर्दैन । म नेतृत्व छाड्दिनँ,” ओलीको भनाइ उद्धृत गर्दै एक पदाधिकारीले बताएका छन् ।
ओलीले पार्टीलाई पुनः पुरानै अवस्थामा फर्काउन आफू सक्षम रहेको दाबीसमेत गरेका छन् । “पार्टीलाई फेरि पुरानो अवस्थामा ल्याउँछु । यसको नेतृत्व फेरि पनि मैले नै गर्नुपर्छ,” उनले बैठकमा भनेका थिए ।
सचिवालय बैठक लगातार लम्बिँदै गएपछि निष्कर्षमा पुग्न अध्यक्ष ओलीले दबाब दिएका थिए । तर, त्यस क्रममा Prithvi Subba Gurung ले प्रतिवाद गरेको स्रोतले जनाएको छ । गुरुङले नेतृत्व र पार्टी सञ्चालनको विषयमा गम्भीर छलफल आवश्यक रहेको भन्दै हतारमा निष्कर्ष निकाल्न नहुने धारणा राखेका थिए ।
एमालेभित्र पछिल्लो समय नेतृत्व शैली, पार्टी सञ्चालन, सरकार र संगठनबीचको सम्बन्ध तथा भावी रणनीतिबारे असन्तुष्टि बढ्दै गएको चर्चा छ । सचिवालय बैठकका क्रममा धेरै नेताहरूले पार्टीलाई नयाँ ढंगले पुनर्गठन गर्नुपर्ने आवश्यकता औँल्याइरहेका छन् । यद्यपि अध्यक्ष ओली भने नेतृत्व हस्तान्तरणको पक्षमा नरहेको स्पष्ट संकेत दिएका छन् ।
जारी बैठकमा अध्यक्ष ओलीको जवाफ अझै बाँकी रहेकाले आगामी निष्कर्षले एमालेभित्रको शक्ति सन्तुलन र भावी राजनीतिक दिशा निर्धारण गर्ने आँकलन गरिएको छ ।
