काठमाडाैं । राष्ट्रिय स्वतन्त्र पार्टी (रास्वपा) का सभापति रवि लामिछानेसँग सांसदहरूले शुक्रबार सामूहिक रुपमा भेटघाट तथा छलफल गर्ने भएका छन् ।
पार्टीका प्रवक्ता मनिष झाले सांसदहरूबाट प्राप्त सल्लाह सुझावका आधारमा सभापतिले छलफल गर्ने गरी तालिका बनेको बताउनुभएकाे हाे । सोही क्रममा शुक्रबारै कोशी र मधेश प्रदेशका सांसदहरूसँग छलफल हुने उहाँले बताउनुभयो । कोशीका सांसदहरूसँग शुक्रबार बिहान ११ देखि १ बजेसम्म र मधेशका सांसदहरूसँग शुक्रबार दिउँसो साढे १ देखि साढे ३ बजेसम्म छलफल हुने भएकाे छ ।
विपक्षी दलहरूले संसदमा प्रधानमन्त्री उपस्थित हुनुपर्ने अडानसहित निरन्तर बैठक अवरोध गरिरहेको समयमा सभापति लामिछानेले पार्टीका सांसदहरुसँग सामूहिक छलफल गर्न लाग्नुभएको हो । बजेटको पूर्वसन्ध्यामा हुने साेही छलफलमा सांसदहरुले आ–आफ्ना क्षेत्रका समस्या र अपेक्षाकाे बारेमा पनि जानकारी गराउने भएकाे बुझिएकाे छ।
