एजेन्सी । अमेरिकी राष्ट्रपति डोनाल्ड ट्रम्पले इरानसँगको शान्ति वार्ता अवरुद्ध भएपछि कडा चेतावनी दिँदै समय घर्किँदै गएको बताउनुभएको छ ।
राष्ट्रपति ट्रम्पले सामाजिक सञ्जाल प्लेटफर्म ‘ट्रुथ सोसल’मार्फत इरानले तत्काल उचित कदम नचालेमा उसको अस्तित्व नै खतरामा पर्ने चेतावनी दिनुभएको हो । यो चेतावनी राष्ट्रपति ट्रम्प र इजरायली प्रधानमन्त्री बेन्जामिन नेतन्याहुबीच फोनवार्ता हुनु अघि आएको हो । गत अप्रिलको शुरुमा युद्धविराम घोषणा हुनुअघि पनि राष्ट्रपति ट्रम्पले इरानले सम्झौता नगरे सिंगो सभ्यता समाप्त पार्ने धम्की दिनुभएको थियो ।
राष्ट्रपति ट्रम्पले इरानका मागहरू पूर्ण रूपमा अस्वीकार्य भएको भन्दै हालैको युद्धविराम संकटमा परेको संकेत पनि गर्नुभएको थियो । अर्कोतर्फ, इरानी सञ्चारमाध्यमहरूले भने तेहरानको पछिल्लो प्रस्तावमा अमेरिकाले कुनै ठोस जवाफ दिन नसकेको आरोप लगाएका छन् ।
अमेरिका लचिलाे नबन्दा जारी वार्ता गतिरोधतर्फ धकेलिएको इरानी अधिकारीहरूले जिकिर गरेका हुन् ।
