काठमाडौं । नेपाल वायुसेवा निगमले आफ्नो सामाजिक सञ्जालमार्फत सार्वजनिक गरेको नेटवर्क नक्सामा भएको गम्भीर त्रुटिप्रति क्षमायाचना गरेको छ । बुधबार सार्वजनिक गरिएको उक्त नक्सामा जम्मु–कश्मीरलाई पाकिस्तानको भूभागभित्र देखाइएको थियो ।
बिहीबार बिहान अंग्रेजी भाषामा सूचना जारी गर्दै निगमले भनेको छ, “हाम्रा सामाजिक सञ्जालमा सार्वजनिक गरिएको नेटवर्क नक्सामा भएको त्रुटिका लागि हामी क्षमा प्रार्थी छौँ ।” साथै, अन्तर्राष्ट्रिय सीमासम्बन्धी यस्तो त्रुटिले नेपाल सरकार वा निगमको आधिकारिक धारणा प्रतिनिधित्व नगर्ने पनि स्पष्ट पारेको छ ।
निगमका अनुसार सामाजिक सञ्जालमा सार्वजनिक गरिएको उक्त नक्सा जहाज उडान हुने गन्तव्यहरू देखाउन तयार पारिएको थियो । हाल उक्त पोस्ट हटाइएको (डिलिट) छ र नक्सामा भएको तथ्यगत त्रुटिबारे आन्तरिक समीक्षा भइरहेको जनाइएको छ ।
उक्त नक्सामा जम्मु–कश्मीरको सम्पूर्ण भूभाग पाकिस्तानतर्फ परेको देखाइएको थियो भने ताजिकिस्तान र किर्गिस्तानलाई चीन भित्र समावेश गरिएको थियो ।
