काठमाडौं । संघीय संसद् सचिवालयले सर्वदलीय बैठक आह्वान गरेको छ । सरकारको सिफारिसमा राष्ट्रपतिबाट संघीय संसद्को अधिवेशन आह्वान भएसँगै सचिवालयले बैठक बोलाएको हो ।
गत २१ फागुनमा सम्पन्न प्रतिनिधिसभा सदस्य निर्वाचनबाट निर्वाचित सांसदहरूको पहिलो बैठक १९ चैत दिउँसो २ बजेका लागि तय गरिएको छ ।
संघीय संसद् सचिवालयका सहसचिव तथा प्रवक्ता एकराम गिरीका अनुसार सर्वदलीय बैठक बुधबार दिउँसो १ बजे बस्नेछ । प्रतिनिधिसभाको बैठक सुरु हुनुभन्दा एक घण्टाअघि उक्त बैठक आयोजना गरिनेछ ।
बैठकमा विभिन्न राजनीतिक दलका प्रतिनिधि, सरकारका प्रतिनिधि तथा संघीय संसद् सचिवालयका अधिकारीहरूको सहभागिता रहनेछ ।
आगामी प्रतिनिधिसभा बैठकले सभामुख चयन प्रक्रियालाई अघि बढाउनेछ । साथै, राजनीतिक दलहरूको सहमतिमा शीर्ष नेताहरूले शुभकामना मन्तव्य दिने परम्परा पनि रहेको छ ।
