काठमाडौं । मुलुकभर अहिले पश्चिमी न्यून चापीय प्रणालीसँगै स्थानीय वायुको आंशिक प्रभाव देखिएको छ। मौसम पूर्वानुमान महाशाखा का अनुसार हाल देशका हिमाली भेगमा सामान्यदेखि मध्यम बदली रहेको छ भने कोशी र मधेस प्रदेशका पहाडी क्षेत्रमा आंशिक बादल लागेको छ। देशका अन्य भूभागमा भने मौसम सामान्यतया सफा रहेको जनाइएको छ।
महाशाखाका अनुसार दिउँसो कर्णाली र सुदूरपश्चिम प्रदेशका साथै अन्य प्रदेशका पहाडी तथा हिमाली भूभागमा बादल लाग्ने सम्भावना रहेको छ। तराईका अधिकांश क्षेत्रमा भने आंशिक बदली रहने प्रक्षेपण गरिएको छ।
वर्षा, चट्याङ्ग र असिनाको सम्भावना
आज सुदूरपश्चिम र कर्णाली प्रदेशका केही स्थानहरूमा तथा लुम्बिनी, गण्डकी, बागमती र कोशी प्रदेशका पहाडी भूभागका थोरै स्थानहरूमा मेघगर्जन, चट्याङ्ग र असिनासहित मध्यम वर्षा हुने सम्भावना रहेको महाशाखाले जनाएको छ। सुदूरपश्चिम प्रदेशको तराई क्षेत्रका एक–दुई स्थानमा समेत वर्षा हुन सक्ने अनुमान गरिएको छ।
मौसमविद्हरूका अनुसार यस्तो खालको प्रणाली सक्रिय हुँदा छोटो समयमै तीव्र वर्षा, चट्याङ्ग र असिना पर्ने सम्भावना रहने भएकाले विशेषगरी पहाडी र हिमाली क्षेत्रका बासिन्दालाई सतर्क रहन आग्रह गरिएको छ।
राति पनि बदली कायम रहने
रातिको समयमा पनि लुम्बिनी, कर्णाली र सुदूरपश्चिम प्रदेशका साथै गण्डकी, बागमती र कोशी प्रदेशका पहाडी भूभागमा बदलीको अवस्था कायम रहनेछ। तराईका अन्य क्षेत्रमा भने आंशिक बदली रहने अनुमान गरिएको छ।
राति कर्णाली र सुदूरपश्चिमका केही स्थानहरूमा तथा लुम्बिनी र गण्डकीका थोरै स्थानमा चट्याङ्ग र असिनासहित मध्यम वर्षा हुन सक्ने सम्भावना रहेको छ। यसैगरी, बागमती र कोशी प्रदेशका हिमाली भेगका एक–दुई स्थानमा हल्का हिमपातको समेत सम्भावना रहेको महाशाखाले जनाएको छ।
सतर्कता अपनाउन आग्रह
मौसम पूर्वानुमान महाशाखाले सम्भावित वर्षा, चट्याङ्ग र असिनाका कारण दैनिक जनजीवन, कृषि, यातायात तथा हवाई उडानमा आंशिक प्रभाव पर्न सक्ने भएकाले आवश्यक सतर्कता अपनाउन अनुरोध गरेको छ। विशेषगरी पहाडी तथा हिमाली क्षेत्रमा यात्रा गर्नेहरू, किसानहरू र खुला स्थानमा काम गर्ने नागरिकलाई सचेत रहन सुझाव दिइएको छ।
पश्चिमी प्रणाली सक्रिय रहँदासम्म आगामी केही दिन मौसम आंशिक अस्थिर रहने सम्भावना रहेको मौसमविद्हरूले बताएका छन्। यस्तो अवस्थामा स्थानीय प्रशासन र सरोकारवाला निकायहरूले पनि पूर्वतयारी र सचेतना बढाउनुपर्ने आवश्यकता औंल्याइएको छ।
