काठमाडौं । परराष्ट्र मन्त्रालय अन्तर्गत राहदानी विभागले नयाँ प्रणाली कार्यान्वयन गर्दा राहदानी वितरण सेवा अस्थायी रूपमा अवरुद्ध हुनसक्ने चेतावनी जारी गरेको छ। विभागका अनुसार नयाँ प्रणाली स्थापनाको प्रारम्भिक चरणमा सेवा प्रभावित भई एकदेखि तीन हप्तासम्म बन्द हुन सक्ने छ।
विभागले जनाएको छ कि वर्तमान प्रणालीबाट नयाँ प्रणालीमा सरेपछि अन्तरिम अवस्थामा प्रणाली स्थिरीकरण नभएसम्म जिल्ला तथा इलाका प्रशासन कार्यालय र विदेशस्थित नेपाली नियोगबाट प्रदान गरिने राहदानी सेवामा ढिलाइ हुनसक्नेछ। विभागबाट प्रत्यक्ष प्रदान गरिने राहदानी सेवा पनि करिब एक हप्तासम्म अवरुद्ध हुन सक्ने छ।
सूचनामा भनिएको छ कि नयाँ प्रणाली स्थिर हुन एकदेखि तीन महिनासम्म समय लाग्ने अपेक्षा गरिएको छ। यस अवधिमा सेवाग्राहीले आवेदन दिनु भए पनि राहदानी तयार हुने प्रक्रिया हालको भन्दा बढी समय लिन सक्ने सम्भावना रहेको छ।
राहदानी विभागले आगामी ६ महिनाभित्र (२०८३ असोज भित्र) राहदानी आवश्यक पर्ने व्यक्तिहरूलाई अनुरोध गरेको छ कि प्रणाली सुरु हुनु अघि नै सम्बन्धित जिल्ला/इलाका प्रशासन कार्यालय, विदेशस्थित नेपाली नियोग वा विभागबाट राहदानी सेवा लिनुहोस्।
नयाँ प्रणालीको सुरु हुने मिति र अन्तरिम अवधिमा गरिने व्यवस्थाबारे विभागले अर्को सूचनामार्फत थप जानकारी उपलब्ध गराउने जनाएको छ।
यस कदमले राहदानी प्रक्रियामा आधुनिकिकरण र डिजिटल प्रणाली लागू गर्ने उद्देश्य राखेको भए पनि प्रारम्भिक चरणमा असुविधा हुन सक्ने चेतावनी विभागले जारी गरेको हो।
