काठमाडौं । फाल्गुन शुक्ल पूर्णिमाका दिन मंगलबार बेलुका ग्रस्तोदित खण्डग्रास चन्द्रग्रहण लाग्ने भएको छ ।
नेपाल पञ्चाङ्ग निर्णायक विकास समिति ले करिब आधा भाग ढाकिने खण्डग्रास चन्द्रग्रहण लाग्ने जनाएको हो । समितिका अध्यक्ष शम्भुप्रसाद ढकाल का अनुसार चन्द्रग्रहण स्पर्श हुँदा खग्रास भए पनि नेपालमा चन्द्रोदयपछि भने खण्डग्रासका रूपमा देखिनेछ ।
मंगलबार साँझ ६ बजेर ३ मिनेटमा चन्द्रोदय हुँदा नै ग्रस्तोदित अवस्थामै चन्द्रमा उदाउनेछ भने बेलुका ७ बजेर ४ मिनेटमा ग्रहण समाप्त हुनेछ । नेपालबाट करिब एक घण्टा चन्द्रग्रहण देखिने जनाइएको छ ।
खगोलविद्का अनुसार चन्द्रग्रहण हेर्न विशेष उपकरण आवश्यक पर्दैन र यसले आँखालाई असर गर्दैन । खुला स्थानबाट नाङ्गो आँखाले पनि अवलोकन गर्न सकिन्छ । यो ग्रहण यस वर्ष नेपालबाट दोस्रो पटक देखिन लागेको हो । यसअघि गत भदौ २२ गते खग्रास चन्द्रग्रहण लागेको थियो ।
चन्द्रग्रहण पूर्णिमा र सूर्यग्रहण औँसी तिथिमा लाग्ने गर्दछ । ग्रहणका बेला जप, स्नान, ध्यान, पाठलगायतका कर्म गर्ने शास्त्रीय परम्परा छ । मंगलबार बिहान ९ बजेदेखि बेलुका ७ बजेर ४ मिनेटसम्म भोजन नगर्नु पर्ने मान्यता भए पनि बालबालिका, रोगी, अशक्त तथा वृद्धवृद्धाका लागि यो नियम अनिवार्य छैन ।
यसपछि २०८४ सालमा खण्डग्रास सूर्यग्रहण देखिने समितिले जनाएको छ ।
