एजेन्सी । अली खामेनी को मृत्यु भएको पुष्टि भएको छ ।
इरानको सरकारी टेलिभिजनले खामेनीको निधन औपचारिक रूपमा पुष्टि गरेको हो । केही समयअघि राज्य नियन्त्रित प्रसारण माध्यममार्फत उनी अब यस संसारमा नरहेको समाचार सार्वजनिक गरिएको थियो । यसअघि डोनाल्ड ट्रम्प ले पनि खामेनीको मृत्यु भएको दाबी गरेका थिए ।
अमेरिका र इजरायल ले संयुक्त रूपमा शनिबार इरान माथि आक्रमण गरेका थिए । सोही आक्रमणका क्रममा खामेनीको निवाससमेत प्रभावित भएको र त्यही क्रममा उनको निधन भएको जनाइएको छ ।
सन् १९८९ देखि इरानको सर्वोच्च नेतृत्व सम्हाल्दै आएका खामेनी देशका सबैभन्दा प्रभावशाली नेता मानिन्थे । उनी इरानको इतिहासमा मोहम्मद रजा पहलवी पछि सबैभन्दा लामो समय शासन गर्ने नेता र मध्यपूर्वका सबैभन्दा लामो समय पदमा रहने राष्ट्रप्रमुखमध्ये एक थिए ।
खामेनी, इरानका आध्यात्मिक तथा राजनीतिक नेता रुहोल्लाह खुमेनी का निकट सहयोगी थिए । सन् १९७९ को इस्लामिक क्रान्तिमा उनले महत्वपूर्ण भूमिका खेलेका थिए । शाह शासनको विरोधका क्रममा उनी ६ पटक पक्राउ परेका थिए भने ३ वर्ष निर्वासनमा बिताएका थिए ।
सर्वोच्च नेता बन्नुअघि खामेनी इरानका तेस्रो राष्ट्रपतिका रूपमा कार्यरत थिए । इरान–इराक युद्धका बेला उनले देशको नेतृत्व गरेका थिए । सोही अवधिमा इरानी सैन्य दस्ता ‘इस्लामिक रिभोलुसनरी गार्ड’सँग उनको सम्बन्ध बलियो बनेको थियो । उनलाई कट्टरपन्थी तथा कडा धारका नेताका रूपमा चिनिँदै आएको थियो ।
सरकारी टेलिभिजनका प्रस्तोताले रोइरहेको अवस्थामै खामेनीको निधनको घोषणा गर्दै देशभर ४० दिन शोक मनाइने जानकारी दिएका छन् ।
