काठमाडौं । आइसिसी टी-२० विश्वकप २०२६ अन्तर्गत समूह ‘सी’ मा रहेको नेपालले आज (मंगलबार) आफ्नो अन्तिम खेल खेल्दैछ । अघिल्ला तीन खेलमा लगातार हार बेहोर्दै प्रतियोगिताबाट बाहिरिइसकेको नेपालले आफ्नो प्रतिष्ठाका लागि स्कटल्याण्डको सामना गर्न लागेको हो ।
भारतको मुम्बईस्थित ऐतिहासिक वानखेडे रंगशालामा हुने यो खेल नेपाली समय अनुसार बेलुकी ७:१५ बजे सुरु हुनेछ । दुवै टोली सुपर-८ को दौडबाट बाहिरिइसकेका कारण यो खेल केवल एक औपचारिक प्रतिस्पर्धा र सुखद बिदाइको अवसर मात्र हुने देखिन्छ ।
विश्वकपमा नेपालको सुरुवात उत्साहजनक रहे पनि नतिजा भने सुखद रहेन । पहिलो खेलमा टेस्ट राष्ट्र इंग्ल्याण्डलाई कडा टक्कर दिएको नेपाल मात्र ४ रनले पराजित भएको थियो । तर, त्यसपछिका खेलहरूमा भने नेपालले आफ्नो लय कायम राख्न सकेन । इटालीसँग १० विकेट र वेस्ट इण्डिजसँग ८ विकेटको लज्जास्पद हार बेहोरेपछि नेपालको अघिल्लो चरण प्रवेशको सम्भावना समाप्त भएको थियो ।
नेपाल रहेको समूह ‘सी’ बाट इंग्ल्याण्ड र वेस्ट इण्डिजले सुपर-८ मा स्थान सुरक्षित गरिसकेका छन् भने नेपालसँगै स्कटल्याण्ड र इटाली पनि बाहिरिएका छन् ।
खेलको पूर्वसन्ध्यामा आयोजित पत्रकार सम्मेलनमा नेपाली टोलीका कन्सल्टेन्ट प्रशिक्षक निक पोथासले खेलाडीहरूलाई पुरानो गल्ती नदोहोर्याउन सचेत गराएका छन् । उनले भने, ‘हामी स्कटल्याण्डविरुद्धको खेलमा खेलाडीहरूले उच्च प्रतिस्पर्धा गरेको र एउटै गल्ती पटक-पटक नदोहोर्याएको हेर्न चाहन्छौँ । हाम्रो लागि यो नै सबैभन्दा महत्त्वपूर्ण पक्ष हो ।’
प्रशिक्षक पोथासले टोलीमा प्रदर्शनको निरन्तरता हुनुपर्नेमा जोड दिएका छन् । ‘एउटा राम्रो खेल खेल्दैमा कोही उत्कृष्ट बन्न सक्दैन, त्यसका लागि प्रदर्शनमा निरन्तरता चाहिन्छ,’ उनले थपे, ‘हामी समर्थकहरूका लागि विश्वकपमा एउटा सुखद सम्झना छाड्न चाहन्छौँ । स्कटल्याण्डविरुद्धको राम्रो नतिजाले आगामी ५० ओभरका खेलहरूका लागि पनि खेलाडीको मनोबल उच्च बनाउनेछ ।’
