काठमाडौं — अन्तरिम सरकारले तोकिएकै मितिमा प्रतिनिधि सभा सदस्य निर्वाचन हुने दाबी गरेको छ।
शुक्रबार सिंहदरबारमा बसेको मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले आगामी फागुन २१ गते नै निर्वाचन हुने स्पष्ट पार्नुभयो। उहाँले मिति तलमाथि नहुने बताउँदै सरकारले निर्वाचन गराउन गम्भीरताका साथ तयारी गरिरहेको उल्लेख गर्नुभयो।
मन्त्री खरेलले भन्नुभयो, “फागुन २१ मा निर्वाचनको मिति तोकिएको छ, त्यो यताउति हुँदैन। निर्वाचन गराउने दायित्व सरकारको मात्रै होइन, सबै सरोकारवाला निकायको हो। निर्वाचन आयोगको निर्णय हामी पर्खनेछौं।”
उहाँले निर्वाचन सफलतापूर्वक सम्पन्न गराउने जिम्मेवारी सरकार, निर्वाचन आयोग तथा अन्य सरोकारवाला निकायको साझा दायित्व भएको समेत स्पष्ट गर्नुभयो।
