काठमाडौं । १५औँ महाधिवेशनको मिति प्रस्ताव गरे लगत्तै तातेको नेपाली कांग्रेसको आन्तरिक राजनीतिलाई सम्बोधन गर्न आज (सोमबार) केन्द्रीय कार्यसम्पादन समितिको बैठक बस्दैछ । ललितपुरस्थित पार्टी केन्द्रीय कार्यालय सानेपामा दिउँसो १ बजे बस्ने बैठकलाई अर्थपूर्ण रूपमा हेरिएको छ ।
गत शुक्रबार बसेको बैठकले आगामी २०८३ वैशाख २८ देखि ३१ गतेसम्म नियमित १५औँ महाधिवेशन गर्ने निर्णय गरेको थियो । तर, यो निर्णयले पार्टीभित्रको असन्तुष्टि साम्य हुनुको साटो झन् बढेको छ । महामन्त्रीद्वय गगनकुमार थापा र विश्वप्रकाश शर्माले विधानको बाध्यात्मक व्यवस्थालाई टेकेर यही पुस २७ र २८ गते विशेष महाधिवेशनको तयारी थालेपछि नेतृत्व दबाबमा परेको हो ।
कांग्रेसको विधानले कुल महाधिवेशन प्रतिनिधिको ४० प्रतिशतले लिखित माग गरेमा तीन महिनाभित्र विशेष महाधिवेशन बोलाउनुपर्ने बाध्यात्मक व्यवस्था गरेको छ । गत असोज २९ गते नै ५४ प्रतिशत अर्थात् २ हजार ४ सय ८८ जना प्रतिनिधिले विशेष महाधिवेशनको माग गर्दै हस्ताक्षर बुझाइसकेका छन् । १४औँ महाधिवेशनका कुल ४ हजार ७ सय ४३ प्रतिनिधिमध्ये बहुमतले हस्ताक्षर बुझाएको अवस्थामा नेतृत्वले त्यसलाई छल्न खोजेको आरोप लाग्दै आएको छ ।
मुख्यसचिव कृष्णप्रसाद पौडेलका अनुसार आजको बैठकमा समसामयिक राजनीतिक विषयमा छलफल हुनेछ, तर मुख्य एजेन्डा महाधिवेशनकै वरिपरि घुम्ने निश्चित छ । महामन्त्रीद्वयको तयारी र विधानको अङ्कगणितलाई नेतृत्वले कसरी व्यवस्थापन गर्छ भन्ने कुराले आजको बैठकको महत्त्व बढाएको छ ।
