मोटरसाइकलको ठक्करबाट साइकलयात्रीको मृत्यु !
जन न्युज नेपाल खवर
मोरङमा मोटरसाइकलको ठक्करबाट साइकलमा सवार एकको मृत्यु भएको छ।
बिहीबार बिहान ११ बजे सुन्दरहरैचा नगरपालिका-६ स्थित पुर्वपश्चिम राजमार्गमा पूर्वतर्फ आउँदै गरेको ना २९ प ६९५२ नम्बरको मोटरसाईकलले बाटो काट्दै गरेको साइकललाई ठक्कर दिएको थियो।
मोटरसाइकलको ठक्करबाट सोही स्थानका साइकल चालक २८ वर्षीय नवराज बराइली र पछाडि सवार ४५ वर्षीय डम्बर बहादुर श्रेष्ठ घाइते भएका थिए।
मोटरसाइकल चालक बारा सिमरा-८का ४५ वर्षीय राजकुमार पुलामी पनि घाइते भएको जिल्ला प्रहरी कार्यालय मोरङले जनाएको छ।
उनीहरू तीनै जनालाई विराट नर्सिङ होम विराटनगरतर्फ पठाइएको थियो।
तर साइकल पछाडि सवार डम्बर बहादुर श्रेष्ठको पौने १२ बजे मृत्यु भएको कार्यालयका डिएसपी मान बहादुर राईले जानकारी दिए।
साइकल चालक नवराज बराइलीको अवस्था पनि गम्भीर छ भने मोटरसाइकल चालक पुलामीको अवस्था सामान्य छ। प्रहरीले साइकल र मोटरसाइकललाई नियन्त्रणमा लिएको छ। घटनाबारे थप अनुसन्धान गरिरहेको प्रहरीले जनाएको छ।
