काठमाडौं । अस्ट्रेलियाको नर्दन टेरिटोरीमा जारी टप एन्ड टी-२० सिरिजमा लगातार तीन हार बेहोरेको नेपाली राष्ट्रिय क्रिकेट टोली आज आफ्नो चौथो खेलमा पहिलो जितको खोजीमा मैदान उत्रँदैछ । नेपालले आज बिग ब्यास लिगको अनुभवी टोली होबार्ट हरिकेन्सको सामना गर्नेछ ।
डार्विनको पार्मर्स्टनस्थित काजालिस एरेनामा हुने खेल नेपाली समयअनुसार बिहान सवा ११ बजे सुरु हुनेछ । कप्तान रोहित पौडेलको नेतृत्वमा रहेको नेपाली टोलीका लागि यो खेल प्रतिष्ठाको लडाइँ बन्नेछ भने हरिकेन्सको कप्तानी बिग ब्यासका अनुभवी खेलाडी म्याकालिस्टर राइटले सम्हाल्नेछन् ।
प्रतियोगितामा नेपालको सुरुवात सुखद रहन सकेको छैन । हालसम्म खेलेका तीनवटै खेलमा पराजित भएको नेपाल पहिलो खेलमा एनटी स्ट्राइकसँग ४२ रन, दोस्रोमा बंगलादेश ‘ए’ सँग ३२ रन तथा तेस्रो खेलमा मेलबर्न स्टार्ससँग ३१ रनले पराजित भएको थियो । लगातारको हारले टोलीको मनोबलमा असर गरे पनि आजको खेलबाट पुनरागमन गर्ने दबाबमा नेपाल छ ।
नेपालको प्रतिद्वन्द्वी होबार्टको प्रदर्शन पनि मिश्रित रहेको छ । ३ खेल खेलेको होबार्टले १ खेलमा जित निकालेको छ भने दुई खेलमा पराजित भएको छ । पहिलो खेलमा एसीटीलाई हराएको होबार्ट त्यसपछि मेलबर्न स्टार्स र एनटी स्ट्राइकसँग पराजित भएको थियो ।
११ टोली सहभागी यस सिरिजमा सबै टोलीले ६-६ लिग खेल खेलेपछि शीर्ष ४ मा रहने टोलीले सेमिफाइनल खेल्नेछन् । हाल अंकविहीन रहँदै पुछारबाट दोस्रो स्थानमा रहेको नेपाललाई सेमिफाइनलको झिनो आशा जीवित राख्न पनि आजको खेल जित्नै पर्ने दबाब छ । यो खेलपछि नेपालले बुधबार मेलबर्न रेनेगेड्स र शुक्रबार पाकिस्तान शाहिन्ससँग खेल्ने तालिका रहेको छ ।
