काठमाडौं । मनसुनी न्यून चापीय रेखा नेपालको तराई भूभाग नजिकै सक्रिय रहँदा देशभरको मौसम बदली भई अधिकांश स्थानमा वर्षाको सम्भावना बढेको छ । मौसम पूर्वानुमान महाशाखाले विशेषगरी कोशी, बागमती र मधेस प्रदेशका केही स्थानमा भारी वर्षा हुनसक्ने भन्दै आवश्यक सतर्कता अपनाउन आग्रह गरेको छ ।

महाशाखाका अनुसार, हाल कोशी, मधेस, बागमती, गण्डकी र लुम्बिनी प्रदेशका केही स्थानमा हल्कादेखि मध्यम वर्षा भइरहेको छ । मनसुनको प्रभावले आज दिनभर देशभरको मौसम सामान्यतया बदली रहनेछ । दिउँसो कोशी, बागमती, गण्डकी र कर्णाली प्रदेशका पहाडी भूभागका केही स्थानमा र बाँकी भूभागका थोरै स्थानमा मध्यम वर्षाको सम्भावना छ । यसैगरी, कोशी र बागमती प्रदेशको पहाडी भूभागका एक–दुई स्थानमा भारी वर्षासमेत हुन सक्ने पूर्वानुमान गरिएको छ ।

यो क्रम राति पनि जारी रहनेछ । राति मधेस प्रदेशका साथै कोशी, बागमती, गण्डकी र लुम्बिनी प्रदेशका केही स्थानमा मध्यम वर्षाको सम्भावना छ। राति भारी वर्षाको सम्भावना कोशी र बागमतीका पहाडी भूभागका साथै मधेस प्रदेशका एक–दुई स्थानमा समेत रहेको महाशाखाले जनाएको छ ।

महाशाखाले कोशी, मधेस र बागमती प्रदेशका एक–दुई स्थानमा भारी वर्षाको सम्भावना रहेकाले त्यस क्षेत्रमा आवश्यक सतर्कता अपनाउन विशेष अनुरोध गरेको छ । भारी वर्षाका कारण पहाडी भूभागमा पहिरो तथा गेग्रान बहावको जोखिम बढ्ने, नदीनाला तथा खहरे खोलाहरूमा पानीको सतह बढ्न सक्ने र सडक तथा हवाई यातायातमा समेत सामान्य अवरोध आउन सक्नेतर्फ सचेत रहन आग्रह गरिएको छ ।