काठमाडौं । नेपाली कांग्रेसका नेता उदयशमशेर जबराले पार्टीको १५औँ महाधिवेशनमा महामन्त्री पदका लागि उम्मेदवारी दर्ता गराउनुभएको छ। उहाँले मंगलबार राष्ट्रिय सभा गृह पुगेर खुलातर्फको महामन्त्री पदमा आफ्नो मनोनयन दर्ता गराउनुभएको हो।
मनोनयन दर्तापछि सञ्चारकर्मीसँग कुरा गर्दै जबराले नेपाली कांग्रेसलाई थप सुदृढ र प्रभावकारी बनाउन आफूले महामन्त्री पदमा उम्मेदवारी दिएको बताउनुभयो। उहाँले पार्टी नेतृत्वले अब भाषण र अभिव्यक्तिमा मात्र सीमित नभई परिणाममुखी काम अर्थात् ‘डेलिभरी’ मा जोड दिनुपर्ने धारणा राख्नुभयो।
जबराले आफूले पार्टीमा यसअघि पाएका विभिन्न जिम्मेवारीलाई जिम्मेवारीपूर्वक पूरा गर्दै आएको दाबी गर्नुभयो। उहाँले तरुण दलमा रहँदा तथा हाल सहमहामन्त्रीको जिम्मेवारीमा रहँदा पनि आफूले पार्टीका लागि काम गरेको उल्लेख गर्नुभयो।
उहाँले नेतृत्वको जिम्मेवारी केवल बोलेर वा भाषण गरेर पूरा नहुने बताउँदै पार्टी संगठनलाई प्रभावकारी बनाउन कामबाट परिणाम देखाउनुपर्नेमा जोड दिनुभयो।
जबराले भन्नुभयो, ‘अब नेतृत्वको जिम्मेवारी बोलेर र भाषण गरेर मात्र पूरा हुँदैन।’ उहाँले आफूले पार्टीका विभिन्न तहमा पाएको जिम्मेवारी पूरा गरेको उल्लेख गर्दै आगामी दिनमा महामन्त्रीको जिम्मेवारी पाए त्यसलाई पनि परिणाममुखी ढङ्गले निर्वाह गर्ने प्रतिबद्धता व्यक्त गर्नुभयो।
कांग्रेसको १५औँ महाधिवेशनअन्तर्गत महामन्त्रीको सङ्ख्या दुईबाट बढाएर तीन पुर्याइएको छ। नयाँ व्यवस्थाअनुसार दुई जना खुला र एक जना महिला महामन्त्री निर्वाचित हुनेछन्।
खुला महामन्त्रीका दुई पदका लागि विभिन्न नेताहरूले उम्मेदवारी दर्ता गराइरहेका छन्। यससँगै महामन्त्री पदमा प्रतिस्पर्धा थप रोचक बनेको छ। महिला महामन्त्रीतर्फ पनि छुट्टै प्रतिस्पर्धा हुने व्यवस्था गरिएको छ।
जबराको उम्मेदवारीसँगै कांग्रेसको १५औँ महाधिवेशनमा नेतृत्व चयनका लागि उम्मेदवारी दर्ता प्रक्रिया थप सक्रिय बनेको छ। उम्मेदवारी दर्तापछि दाबीविरोध, उम्मेदवारको अन्तिम नामावली प्रकाशन तथा निर्वाचनका अन्य प्रक्रिया अघि बढ्नेछन्।
