काठमाडौं । चितवन प्रहरीले बिलबिजकबिना मोबाइल फोन ओसारपसार गरेको आरोपमा थप एक जनालाई पक्राउ गरेको छ। प्रहरीले भरतपुर महानगरपालिका–१ रामनगरबाट पोखरातर्फ बिलबिजकबिना मोबाइल लैजाँदै गरेको अवस्थामा तनहुँका एक युवकलाई नियन्त्रणमा लिएको हो।
प्रहरीका अनुसार आइतबार साँझ करिब ७ बजे रामनगर क्षेत्रमा बिलबिजकबिना मोबाइल फोन ओसारपसार भइरहेको सूचना प्राप्त भएपछि प्रहरी टोली परिचालन गरिएको थियो। त्यस क्रममा रामनगरबाट जुगेडी हुँदै पोखरा जाँदै गरेको अवस्थामा तनहुँको व्यास नगरपालिका–२ का २८ वर्षीय उमनन्द भुजेललाई प्रहरीले नियन्त्रणमा लिएको हो।
चितवन प्रहरी प्रमुख रामेश्वर पौडेलका अनुसार भुजेलको शरीर तथा साथमा रहेको झोला खानतलासी गर्दा बिलबिजक नभएका ५ थान iPhone फेला परेका थिए। प्रहरीले ती मोबाइल फोन कानुनबमोजिम बरामद गरी भुजेललाई पक्राउ गरेको जनाएको छ।
बरामद मोबाइलसहित पक्राउ परेका भुजेललाई आवश्यक कारबाहीका लागि भन्सार कार्यालय वीरगञ्ज पठाइएको प्रहरीले जनाएको छ। उनीमाथि बिलबिजकबिना मोबाइल ओसारपसार गरेको विषयमा थप अनुसन्धान तथा कानुनी प्रक्रिया अघि बढाइएको छ।
यसअघि पनि चितवन प्रहरीले बिना बिल मोबाइल बिक्री गरेको आरोपमा दीपक मोबाइल हाउसका सञ्चालक दीपक प्रसाईंलाई पक्राउ गरेको थियो। उक्त घटनामा प्रहरीले ठूलो संख्यामा मोबाइल तथा विद्युतीय उपकरण बरामद गरेको थियो।
चितवन प्रहरीले पछिल्ला दुई छुट्टाछुट्टै कारबाहीबाट कुल ६७ थान मोबाइल तथा विद्युतीय उपकरण बरामद गरेको जनाएको छ। बरामद सामग्रीमा ५० थान iPhone, ८ थान Samsung, २ थान Redmi, १ थान iPad, १ थान Vivo र थप ५ थान iPhone रहेका छन्।
प्रहरीका अनुसार बिलबिजकबिना मोबाइल तथा विद्युतीय उपकरणको कारोबार र ओसारपसार भइरहेको सूचनाका आधारमा निगरानी तथा कारबाहीलाई तीव्र पारिएको हो। अवैध रूपमा कारोबार हुने मोबाइल तथा विद्युतीय उपकरण नियन्त्रण गर्न प्रहरीले सम्बन्धित क्षेत्रमा निगरानी बढाएको जनाएको छ।
बिलबिजकबिना बरामद भएका मोबाइलको स्रोत, कारोबारमा संलग्न व्यक्ति तथा त्यसको वितरण सञ्जालबारे समेत अनुसन्धान भइरहेको प्रहरीले जनाएको छ। बरामद मोबाइल तथा उपकरणको कानुनी अवस्था र सम्बन्धित व्यक्तिको भूमिकाबारे थप अनुसन्धानपछि आवश्यक कारबाही अघि बढाइने बताइएको छ।
चितवन प्रहरीले घटनाबारे थप अनुसन्धान भइरहेको जनाउँदै बिना बिल मोबाइल तथा विद्युतीय उपकरणको कारोबार वा ओसारपसार नगर्न सम्बन्धित व्यवसायी तथा सर्वसाधारणलाई सचेत गराएको छ।
