काठमाडौं । नेकपा (एमाले) ले पार्टी एकता, अनुशासन र मर्यादालाई केन्द्रमा राख्दै आन्तरिक बहस तथा छलफललाई व्यवस्थित गर्ने निर्णय गरेको छ ।
कोशी, वाग्मती, मधेस र उपत्यका विशेष प्रदेशका नेता तथा जिल्ला सचिवालय सदस्यहरूसँगको छलफलपछि पार्टीका सचिव शेरधन राईले बैठकका निर्णयबारे जानकारी दिएका हुन् ।
पार्टी विभाजनको हल्ला र अड्कलबाजीलाई खण्डन गर्दै एमालेले आगामी दिनका लागि दुई प्रमुख कार्यभार तय गरेको र त्यसलाई कार्यान्वयन गर्न १५ बुँदे कार्ययोजना पारित गरेको राईले बताए ।
उनका अनुसार पार्टीभित्र छलफल र बहस गर्न पाइने भए पनि आन्तरिक विषय सार्वजनिक गर्न नपाइने निर्णय गरिएको छ ।
‘तेस्रो पूर्ण बैठक पार्टीभित्र विभाजन हुने विभिन्न हल्ला र अड्कलबाजीलाई चिर्दै एकताबद्ध रूपमा सर्वसम्मतिले महत्वपूर्ण निर्णय गर्दै सम्पन्न भएको छ । बैठकले पार्टी एकता, अनुशासन र मर्यादालाई केन्द्रमा राख्दै आन्तरिक बहस र छलफल गर्न सकिने तर पार्टीभित्रका विषय बाहिर सार्वजनिक गर्न नपाइने निर्णय गरेको छ,’ राईले भने ।
एमालेले मुलुकको वर्तमान राजनीतिक अवस्थाप्रति चिन्ता व्यक्त गर्दै पहिलो कार्यभारका रूपमा लोकतन्त्र, संविधान, राष्ट्रियता र स्वाधीनताको रक्षा गर्ने तथा लोकतान्त्रिक शक्तिहरूलाई एकताबद्ध गरी आन्दोलन अघि बढाउने निर्णय गरेको छ ।
सुकुम्बासी बस्तीमा डोजर चलाइएको विषय, ट्रेड युनियनमाथिको नियन्त्रण र बढ्दो महँगीलगायत विषयलाई लिएर लोकतान्त्रिक शक्तिहरूसँग साझा मोर्चा बनाएर अघि बढ्ने रणनीति एमालेले तय गरेको राईले बताए ।
दोस्रो कार्यभार आगामी वैशाखमा हुने भनिएको निर्वाचनलाई केन्द्रित गर्दै पार्टीका गतिविधि अघि बढाउने रहेको छ । निर्वाचन केन्द्रित गतिविधिलाई प्रभावकारी बनाउन बैठकले १५ बुँदे कार्ययोजना पारित गरेको एमालेले जनाएको छ ।
राईका अनुसार तेस्रो पूर्ण बैठकका निर्णय पार्टी पङ्क्तिमा सम्प्रेषण गर्न प्रदेश तथा जिल्ला कमिटीका सचिवालय सदस्यहरूको संयुक्त भर्चुअल भेला आयोजना गरिएको हो ।
‘पहिलो, लोकतन्त्र, संविधान, राष्ट्रियता र स्वाधीनताको रक्षा गर्दै लोकतान्त्रिक शक्तिहरूलाई एकताबद्ध गरी आन्दोलन अघि बढाउने । दोस्रो, आगामी निर्वाचनलाई केन्द्रित गर्दै पार्टीका गतिविधि अघि बढाउने । यी दुई कार्यभार पूरा गर्न बैठकले १५ वटा महत्वपूर्ण कामसमेत तय गरेको छ,’ उनले भने ।
अध्यक्ष केपी शर्मा ओलीले बैठकबाट तय भएका कार्यभार र कार्ययोजनालाई तल्लो तहसम्म प्रभावकारी रूपमा सम्प्रेषण गर्न अगुवा नेता तथा कार्यकर्तालाई निर्देशन दिएका छन् ।
