रामेछाप । नेपाली कांग्रेसको १५औँ महाधिवेशनअन्तर्गत रामेछाप जिल्लाबाट खस–आर्यतर्फ महाधिवेशन प्रतिनिधिका लागि काजीबहादुर खड्का ‘दिनेश’ले उम्मेदवारी दिएका छन्।
खड्का नेपाल तरुण दल रामेछापका अध्यक्ष तथा गोकुलगंगा गाउँपालिकाका अध्यक्ष हुन्। स्थानीय तहको नेतृत्वसँगै नेपाली कांग्रेसको संगठन तथा राजनीतिक गतिविधिमा सक्रिय रहँदै आएका खड्काले १५औँ महाधिवेशनमा खस–आर्यतर्फबाट महाधिवेशन प्रतिनिधिका रूपमा उम्मेदवारी दिएका हुन्।
खड्काको उम्मेदवारीलाई समर्थन गर्दै गोकुलगंगा गाउँपालिका–५, नामाडीका क्षेत्रीय प्रतिनिधिले रामेछाप जिल्लाका ६४ वटै वडाका वडा सभापति, सम्पूर्ण क्षेत्रीय प्रतिनिधि तथा ८ वटै नगरपालिका तथा गाउँपालिका सभापतिहरूलाई आफ्नो अमूल्य मत प्रदान गरी खड्कालाई विजयी गराउन अपिल गरेका छन्।
समर्थकले खड्कालाई रामेछाप कांग्रेसका युवाहरूको आशा र भरोसाका रूपमा प्रस्तुत गर्दै पार्टी संगठनलाई थप सुदृढ बनाउन उहाँको उम्मेदवारी महत्वपूर्ण रहेको बताएका छन्।
रामेछापमा नेपाली कांग्रेसको १५औँ महाधिवेशनअन्तर्गत वडा तथा पालिका तहका अधिवेशन सम्पन्न हुने क्रमसँगै महाधिवेशन प्रतिनिधि चयनको प्रक्रिया अघि बढिरहेको छ। जिल्लाबाट विभिन्न समूह तथा क्लस्टरबाट महाधिवेशन प्रतिनिधि चयन हुनेछन्।
काजीबहादुर खड्का ‘दिनेश’को उम्मेदवारीसँगै रामेछाप कांग्रेसको खस–आर्यतर्फ महाधिवेशन प्रतिनिधि चयनका लागि प्रतिस्पर्धा थप रोचक बनेको छ।
