सुनसरी । सुनसरीको इटहरीमा करेन्ट लागेर एक युवकको मृत्यु भएको छ । इटहरी उपमहानगरपालिका–१० संविधान चोकस्थित निर्मला स्टिल फेब्रिकेसन ट्रेनिङ सेन्टरमा काम गर्ने २० वर्षीय शिवम् विकको करेन्ट लागेर मृत्यु भएको हो ।
उदयपुरको चौदण्डीगढी नगरपालिका–२ घर भएका विक हाल इटहरीमा बस्दै आएका थिए । उनी उक्त स्टिल फेब्रिकेसन ट्रेनिङ सेन्टरमा काम गर्दै आएका थिए ।
प्रहरीका अनुसार सोमबार बिहान मोटरको स्विच अन गर्ने क्रममा अचानक विकको बायाँ हातमा करेन्ट लागेको थियो । करेन्ट लागेर गम्भीर घाइते भएका उनलाई तत्काल उपचारका लागि इटहरी सामुदायिक अस्पताल लगिएको थियो ।
इटहरी सामुदायिक अस्पतालमा प्रारम्भिक तथा सामान्य उपचारपछि उनको अवस्था थप उपचार आवश्यक पर्ने देखिएपछि विराटनगरस्थित विराट मेडिकल कलेज टिचिङ अस्पतालमा रेफर गरिएको थियो । त्यसपछि उनलाई थप उपचारका लागि विराट मेडिकल कलेज टिचिङ अस्पताल विराटनगर पु¥याइएको थियो ।
तर अस्पतालमा उपचार भइरहेका क्रममा विकको मृत्यु भएको इलाका प्रहरी कार्यालय इटहरीका प्रमुख प्रहरी नायब उपरीक्षक सुवास हमालले जानकारी दिए ।
प्रहरी नायब उपरीक्षक हमालका अनुसार मोटरको स्विच अन गर्ने क्रममा करेन्ट लागेपछि उनी घाइते भएका थिए । घटनापछि प्रहरी टोलीले घटनास्थलको प्रारम्भिक निरीक्षण गरी घटनाबारे आवश्यक अनुसन्धान अघि बढाएको जनाएको छ ।
करेन्ट लाग्नुको वास्तविक कारण, मोटर तथा विद्युतीय उपकरणको अवस्था र घटनाको अन्य पक्षबारे प्रहरीले थप अनुसन्धान गरिरहेको छ । घटनासम्बन्धी थप विवरण अनुसन्धानपछि खुल्ने प्रहरीले जनाएको छ ।
यस घटनाले औद्योगिक तथा फेब्रिकेसन क्षेत्रमा काम गर्दा विद्युतीय उपकरण सञ्चालनमा आवश्यक सुरक्षा सावधानी अपनाउनुपर्ने देखाएको छ । विशेषगरी मोटर तथा अन्य विद्युतीय उपकरण सञ्चालन गर्नुअघि विद्युत् जडान, स्विच तथा उपकरणको अवस्था जाँच गर्नुपर्ने आवश्यकता देखिन्छ ।
